Categories
Aktualitet

863 mijë eurot e Elbasanit nën ekspertizë për shenjat e gishtave mbi to

863 mijë eurot e sekuestruara në makinën e Orest Sotës janë marrë në dorëzim prej policisë nga Prokuroria e Elbasanit. Lapsi.al mësoi se ato janë dorëzuar ditën e premte në organin e akuzës së bashku me deklarimet dhe formularët e plotësuar nga policia e shtetit. Burimet thanë se shuma e të hollave do të kalojë nën një ekspertizë të hollësishme për të parë gjurmët e gishtave të lëna mbi to. Problemi qëndron te policia e shtetit që dyshohet se i ka numëruar ato duke shtuar gjurmë të tjera gishtash dhe duke e bërë më të vështirë punën e ekspertëve. Kjo ekspertizë pritet të hedhë dritë edhe mbi pyetjen nëse paratë i përkisnin Saimir Tahirit. Nëse në kartëmonedha do të gjenden gjurmët e gishtave të ish-ministrit atëherë kjo është një provë e fortë që përveç patentave implikojnë direkt deputetin Tahiri. /LAPSI.al

Categories
Aktualitet

Altin Qato: Ja kush i nxori emrat e biznesmenëve në Elbasan

Drejtor i komanduar i Drejtorisë së Policisë Elbasan Altin Qato, është shprehur edhe për një ngjarje që ka përfshirë Elbasanin pasditen e sotme ku janë publikuar emrat e 67 biznesmenëve nga ky qytet të cilët po u hetohen pasuritë.

I pyetur nëse a është Drejtoria e Policisë Elbasan pjesë e këtij hetimi Qato u përgjigj me diplomaci: Ne nuk i tejkalojmë normat e hetimit. Të dhënat dalin nga hetimet. Ne nuk kemi nxjerrë emra.

Sipas kësaj deklarate emrat e biznesmenëve elbasanas që po hetohen kanë dalë ose nga burime të Drejtorisë së tatimeve ose nga burime hetimore të organit të Prokurorisë. /Infoelbasani.al

Categories
Aktualitet

Ja patentat në emër të Saimir Tahirit, janë të dyja leje drejtimi për anije 20 dhe 100 tonëshe

Pas publikimit të dosjes ‘Habilaj’, ku dyshohet të jetë i përfshirë në trafikun e drogës ish-ministri i Brendshëm, Saimir Tahiri, vazhdojnë të dalin në dritë të tjera informacione që shtojnë dyshimet rreth tij. “Lapsi.al” publikon sot foto të dy lejeve të drejtimit për mjet lundrues që disponon Saimir Tahiri.

Burime thonë se këto patenta për mjet lundrimi, ku Tahiri ka nivelin ‘Skipper’ (kapiten) u gjetën në makinën e një personi me emrin Orest Sota, i cili u arrestua nga policia e Elbasanit dy ditë më parë. Sotës iu gjetën në makinë edhe 800 mijë euro. Për këtë ngjarje denoncoi i pari kreu i PD-së, Lulzim Basha. Sipas tij Policia e Shtetit me urdhër të Edi Ramës e mbajti të fshehtë ngjarjen.

Pak pas këtij denoncimi të Bashës, ka reaguar Policia e Shtetit përmes një njoftimi për media, ku konfirmohet ngjarja, por nuk përmenden fare dy lejet e drejtimit në emër të Saimir Tahirit që u gjetën në makinën e shtetasit Orest Lefter Sota dhe as shuma prej 800 mijë eurosh. Policia thotë vetëm që iu gjet një shumë e madhe parash, por pa bërë publike vlerën e saktë. Siç shihet në foton e publikuar janë dy leje drejtimi tek të cilat Tahiri ka nivelin ‘Skipper’ (kapiten)’.

Ato ndryshojnë nga njëra tjetra tek tonazhi i lejuar i mjetit. Nuk është e qartë ende se çfarë donte në makinën e Orest Sotës patentat e Saimir Tahirit dhe shuma prej 800 mijë eurosh. A është në dijeni ish-Ministri i Brendshëm se këto patenta i kishte Orest Sota? Kujtojmë që në deklarimet e ditëve të fundit, Saimir Tahiri është shprehur se nuk kishte pasur mjet lundrues, por pa saktësuar nëse kishte apo jo leje drejtimi për këto mjete.

Categories
Aktualitet

Haradinaj, ‘Grupit të Kumanovës’: Nuk i ka dënuar Zoti, por njeriu ndaj mund të bëhet diçka

Kryeministri kosovar Ramush Haradinaj ka dalë në shesh dje tek protestuesit dhe ka diskutuar me familjarët e të dënuarve në rastin Kumanova. Fillimi i komunikimit me ta nuk ka qenë edhe i qetë, pasi disa protestues filluan të brohoritnin “Hiqe Policinë…”.

Këtu ka ardhur në shprehje temperamenti i kryeministrit Haradinaj, i cili ka thirrur “Hej ti, që po pisket atje, mshele. Nëse doni të bisedoni, për atë jam këtu, mundem edhe të kthehem në zyrë”, shkruan Gazetametro.net.

Më pas Haradinaj ka folur me disa nga familjarët të cilëve u ka kërkuar që të jenë të kujdesshëm me veprimet e tyre, sepse siç ka thënë mund të bëni edhe gabime pasi “djemtë nuk janë këtu, por janë atje mshelun”.

Ai ka shprehur gatishmërinë që t’u ndihmojë në këtë rast, por është rezervuar të flasë me detaje para medieve. “Bëjeni një listë nga një për familje, dhe ejani në zyrë te unë. Aty do të diskutojmë më në detaje”.

Lidhur me kërkesën nëse vendimi i gjykatës maqedonase mund të ndryshohet, Haradinaj ka përdorur një shprehje popullore. “Shyqyr, Zoti nuk i ka dënu, por njeriu! Edhe mund të bëhet diçka”.

Categories
Aktualitet

Sistemi i imunizimit, MSH do të fusë dy vaksina të reja

Gjatë viteve të ardhshme, parashikohet futja e kalendarit të vaksinave për vaksinat e Rotavirusit dhe e kancerit të qafës së mitrës (HPV).

Ndërkohë, Ministria e Shëndetësisë është duke punuar përgjatë këtij, viti lidhur me përllogaritjen e kosto-efektivitetit për këto vaksina. Gjatë viteve të fundit, janë futur një sërë vaksinash të reja në kalendarin e imunizimit.

Sipas MSH-së, në vitin 2000, në kalendarin e vaksinimit u përfshi komponenti i Rubeolës në vaksinën FR (Fruth-Rubeole), në vitin 2005, komponenti i Parotitit në vaksinën FRP (Fruth-Rubeole-Parotit), në vitin 2009, komponenti i Haemophilus influenca e tip B në vaksinën e kombinuar DTP-HepB-Hib, dhe në 2011-ën, vaksina e Pneumokokut (PCV10).

Shqipëria ka një nivel vaksinimi në masën 98 për qind, rezultat ky i konsideruar i suksesshëm. Programi shqiptar i imunizimit është vlerësuar edhe nga Organizata Botërore e Shëndetësisë për masën e mbulimit, por edhe të cilësisë së vaksinave.