Categories
Aktualitet Evrope

Zbulohet ‘gabimi’ në spitalin italian / ‘Pacienti 1’ me koronavirus

Një ditë më parë, kryeministri italian, Giuseppe Conte tha se një spital në Itali nuk zbatoi procedurat siç duhet, duke lejuar përhapjen e koronavirusit. Në fakt, Italia tashmë është bërë vatra prej nga po përhapet sëmundja në Europë.

Sipas gazetës Corriere della Sera, gabimi është shënuar në spitalin e qytetit Codogno.

Mattia, i njohur edhe si ‘Pacienti 1’, ka hyrë në dhomën e urgjencës për herë të dytë në orën 3:12 të 19 shkurtit.

Plot 36 orë ka kaluar ai jashtë derisa u kthye sërish në dhomën e urgjencës. Testimet për të u bënë në orën 4 të pasdites më 20 shkurt. 38-vjeçarin e vizituan të afërmit dhe miqtë. Ata morën kontakt me të. Sigurisht edhe mjekët dhe infermierët, por edhe pacientë të tjerë.

Arsyeja se përse nuk iu nënshtrua testimit? Sepse nuk ishte kthyer nga Kina. Por udhëzimet e Ministrisë së Shëndetësisë thonë se çdo rast i dyshuar duhej trajtuar me përparësi. Pneumonia te një 38-vjeçar, i cili njihet si maratonomak dhe futbollist, duhej të ishte një rast për dyshim.

Në orën 21:00 të 20 shkurtit vjen konfirmimi. Ai ishte me koronavirus. Situata në spital bëhet jo vetëm e komplikuar, por edhe kaotike.

‘Pacienti 1’ futet në reanimacion, por infekton edhe dy anestezistët, që sipas protokollit duhej të ishin të mbrojtur. Mjekët dhe infermierët e turnit kthehen në shtëpi me bindjen se duhet të nisin vetizolimin. Por jo, ata thirren sërish në punë.

Gjatë ditës vendoset se kush duhet të izolohet. Atëherë ishte tepër vonë.

/Burimi: SYRI.net

Categories
Aktualitet

Shqiptari hero në Suedi: hyn në mes të flakëve dhe shpëton fqinjin

Një zjarr i rëndë shpërtheu në një bllok banesash në Alby të Suedisë të dielën në mbrëmje. Sipas mediave vendase, një shqiptar së bashku me fqinjët e tjerë janë kthyer në heronj, duke u ardhur në ndihmë të rrezikuarve dhe duke shpëtuar një burrë nga flakët, pasi kishte mbetur i bllokuar në shtëpi.

Flakët që përfshinë zonën ishin shumë të mëdha dhe nëse fqinjët nuk do të ndërhynin me shpejtësi zjarri mund të shkaktonte edhe viktima. Zjarri fillimisht kishte rënë në kuzhinën e banesave dhe më pas ishte shpërndarë me shpejtësi, ku brenda ishte një person.

Ishte shqiptari Kelman Qibini, i cili ishte futur i pari për të shpëtuar fqinjin. “Dëgjova nga jashtë që ai po bërtiste dhe hyra brenda flakëve. Nëse nuk do të ndërhyja dhe personi do të kishte vdekur, do ishte shumë e vështirë të jetoja me këtë mendim”, tha ai për mediat suedeze. Qibini, së bashku me bashkëshorten e tij Matilda kishin vetëm tre muaj që ishin transferuar në zonë, por që tashmë janë kthyer në heronj të vërtetë.

Kelmani tregon se kishte hyrë brenda, por dera ishte e bllokuar. Më pas, tre fqinj të tjerë, që po hidhnin ujë nga dritaret i kanë ardhur në ndihmë për të nxjerrë personin e bllokuar brenda. Burri që jetonte në shtëpi pësoi djegie të rënda, sipas zjarrfikësve, por edhe shtatë nga tetë fqinjët që nxituan ta ndihmojnë për ta nxjerrë nga banesa duhej të shkonin në spital për shkak të thithjes së tymit.

“Ka qenë e vështirë të flemë sonte. Jam akoma i mërzitur nga ajo që ndodhi” tha Kelman Qibini. Në fund Kelman jep edhe një mesazh për komunitetin. “Unë ndoshta kam bërë atë që shumica e njerëzve do të kishin bërë në këtë situatë. Dhe ne ishim shumë fqinj që i ndihmuam”, tregon shqiptari percjell Albinfo.ch.

Categories
Aktualitet

Foto / Artisti përballë Diktaturës!

Nëse ka një rast kuptimplotë që tregon, se si shteti ligjor shqiptarë ka rënë dhe mbi të është instaluar autokracia e Edi Ramës; është ai Teatrit Kombëtarë. Me ligje speciale për vetëm një klient të oborrit të kryeministrit dhe kryebashkiakut, duke shkelur kushtetutën dhe madje edhe konventa evropiane, po grabitet toka publike dhe shkatërrohet një nga të fundmet godina me vlera historike dhe shpirtërore.

Pavarësisht të gjitha këtyre, kundërshtive të komunitetit të artistëve dhe KE-së, peticionit me dhjetëra firma të qytetarëve të kryeqytetit, Edi Rama është i vendosur që të shkojë përpara si një diktator tipik, drejt shembjes dhe grabitjes së Teatrit Kombëtarë.
Natën e mbrëmshme duke aguar 24 korriku, ashtu siç ishte paralajmëruar dhjetëra forca policore e rrethuan Teatrin dhe madje guxuan dhe dhunuan një artist të mirënjohur, si Edmond Budina. Prej disa ditësh qeveria ka urdhëruar çmontimin nga brenda të Teatrit, për ti hapur rrugë makinave të rënda që do ta shembin përtokë përfundimisht, me gjithë vlerat dhe historinë e saj. Dhe për çfarë bëhet e gjitha kjo?!

Për një kompleks kullash gjigante, të cila do ngrihen mbi tokën e përbashkët publike të Teatrit, duke bërë një goditje prej disa qindra milion euro.

Artisët dhe shumë qytetarë që kanë disa ditë që qëndrojnë barrikadë për gjithë natë aty, sot janë gjendur përball dhunës së diktaturës së Edi Ramës. Një foto e shkrepur nga aktivistja e Aleancës për Mbrojtjen e Teatrit Elona Caslli, (me diçiturën, “Artsiti përball diktaturës”), e tregon më së miri këtë. Është aktori i njohur, Neritan Liçi, i cili shfaqet në këtë fotografi i vetëm përball kordonit arrogant të diktaturës, por e vërteta është se prapa tij qëndrojnë të vendosur dhjetëra qytetarë të kryeqytetit dhe qindra mijë, që nuk janë sot në atë shesh.

Categories
Aktualitet

“Lasgushi” parkohet në Stamboll / A u zhduk Air Albania?

Shtohen hijet e dyshimit për kompaninë kombëtare të fluturimit AIR ALBANIA. Mediat e huaja po shkruajnë çdo ditë mbi fatin e kësaj kompanie për të cilën Kryeministri Edi Rama deklaroi se do të ishte krenaria e fluturimeve shqiptare.

Këtë të enjte janë mediat turke ato që shtojnë më shumë pesimizmin mbi aktivitetin e këtij projekti. Websiti i dedikuar lajmeve të fluturimeve ajrore në Turqi “Airport Haber” që në titull ngre pikëpyetjen se a ka përfunduar bashkëpunimi i Turkish Airline me Air Albania? Sipas artikullit partneriteti Turqi-Shqipëri nuk ka funksionuar që nga muaji Qershor i vitit të kaluar. Madje shkrimi konfirmon se kompania Turkish Airline ka tërhequr avionin AIRBUS 319 nga Shqipëria i cili aktualisht ndodhet në pistën e aeroportit të Stambollit duke e paraqitur edhe me foto avionin.

Pas lançimit të këtij projekti të përbashkët me Turqinë, në Tiranë u hapën edhe zyrat e agjencisë shqiptare Air Albania. Por pas një vëzhgimi të bërë këtë të enjte nga News24, siç shihet aktualisht ato nuk funksionojnë. Ambientet e këtyre zyrave janë të boshatisur dhe e vetmja gjë që e identifikon është vetëm logoja me emrin e kompanisë Air Albania.

Faktit se projekti nuk ka marrë ende jetë i shtohet edhe konfirmimi nga ana e autoritetit të Aeroportit të Tiranës i cili i pyetur nga News 24 thotë se ende nuk ka asnjë plan fluturimi të kësaj kompanie.

Sipas këtyre burimeve TIA është në pritje të planit dhe lejes së fluturimit që Aviacioni civil do të firmos për Air Albania. Nga ana tjetër heshtja e autoriteteve shqiptare përballë këtyre fakteve shton edhe më shumë dyshimet se kompania Air Albania nuk funksionon.

Për herë të parë ideja për krijimin e kompanisë kombëtare të fluturimeve u njoftua në Korrik të vitit 2017 si një nismë e përbashkët e kryeministrit Edi Rama dhe presidentit tuk Rexhep Taip Erdogan. Ndërsa konkretizimi i saj u bë në Qershor të 2018. E regjistruar në qendrën kombëtare të biznesit kompania AIR ALBANIA figuron me 3 aksionerë “Turkish Airlines”, “MDN Investment” dhe “Albcontrol”.

Categories
Aktualitet

Punimet në rrugë, nga 4 janari bllokohet autostrada Tiranë-Durrës

Nga 4 janari autostrada Tiranë-Durrës do të mbyllet. ARRSH njoftoi se paralizimi i automjeteve në këtë aks do të bëhet për shkak të punimeve të dy tombinove në segmentin rrugor (autostrada) Tiranë–Qafë Kashar.

Lëvizja në autostradë nga mbikalimi Kamëz – Mbikalimi Qafë Kashar, Rinas do të mbyllet plotësisht për trafikun në të dyja drejtimet e lëvizjes.
Ndërkohë trafiku do të devijohet për të gjitha mjetet në rrugën dytësore, të cilat do të funksionojnë me një drejtim lëvizje.

ARRSH rekomandon përdoruesit e rrugës që gjatë kësaj kohe të zgjedhin rrugë alternative për lëvizjet në drejtim të veriut (nga Kamza) dhe në drejtim të jugut (nga Ndroqi ose Elbasani).

ARRSH dhe policia i kërkonë drejtuesve të mjeteve që të respektojnë në mënyrë rigoroze rregullat e qarkullimit rrugor, sinjalistikën provizore të vendosur në segmentet ku do të punohet dhe udhëzimet e policisë. Ky investim ka për qëllim përmirësimin e situatës së përmbytjeve në këtë rrugë.