Categories
Lifestyle Shëndet

Ushtrime të ngadalta për trup të bukur

Me realizimin e ngadalshëm të ushtrimeve, pa lëvizje të shpejta, arrihen shumë rezultate të mira. Gjashtë ushtrime efikase, kombinim i fitnesit, jogës dhe vallëzimit, forcojnë muskujt, tendosin trupin, por edhe ofrojnë relaks të shkëlqyer.

Udhëzim

Ushtrimet bëni pa pauza. Nga pozita fillestare shkoni deri te ajo e fundit. Përsëritjet, po ashtu, bëni pa pauza. Veproni ngadalë dhe me kontroll. Pa lëvizje të menjëhershme. Është me rëndësi që në çdo moment të ndieni se si zgjohen dhe aktivizohen muskujt.

Për këmbë të holla

Lakojeni gjurin e djathtë dhe zgjateni këmbën e majtë. Grushtin e djathtë vendoseni mbi të majtin dhe mbajini pranë trupit, ndërsa pastaj lëvizni duart majtas dhe njëkohësisht zgjateni këmbën e djathtë dhe lakojeni gjurin e majtë. Pa pauzë kthehuni në pozitë fillestare dhe bëni nga gjashtë deri në tetë përsëritje nga dy seri, ndërsa pastaj ndërroni anët. Ky ushtrim forcon përqendrimin dhe formëson muskujt e pasëm të këmbës dhe prapanicën.

Për energji dhe fuqi

Hapni këmbët, drejtojeni shpinën dhe lakoni gjunjët. Duart mbani përpara trupit, gjysmë të lakuara, ndërsa nga kjo pozitë drejtoni këmbët dhe njëkohësisht rrotullojeni pjesën e sipërme të trupit në të majtë dhe duart zgjatni duke i mbajtur në nivel me supet. Bëni nga tetë deri në dhjetë përsëritje për secilën anë, me nga dy seri.

Për këmbë dhe supe

Zgjateni këmbën e majtë përpara, bashkoni shuplakat para gjoksit, dhe pastaj nga kjo pozitë duke bërë një hap barteni peshën në këmbën e djathtë. Shtrini duart ashtu që shuplakat të jenë paralele. Bëni nga tetë deri në dhjetë përsëritje për secilën anë, nga dy seri. Ky ushtrim do të formësojë këmbët tuaja dhe muskujt e supeve.

Për relaks

Qëndroni ashtu që shputat të preken, shtylla kurrizore është drejtë, ndërsa duart gjenden mbi kokë të bashkuara në shuplaka. Nga kjo pozitë përkuleni trupin përpara dhe me duar kapni majat e gishtave të këmbëve, ndërsa pastaj drejtojuni ngadalë. Bëni nga 10-15 përsëritje në dy seri.

Për trup të zhdërvjellët

Uluni mbi thembra, shuplakat lëshoni përpara gjunjëve, drejtojeni shtyllën kurrizore dhe shikoni para jush. Nga kjo pozitë barteni peshën në duar dhe ngriteni trupin dhe prapanicën lartë. Ky ushtrim bëhet në dy seri nga tetë deri në dhjetë përsëritje. Krahas asaj që trupi juaj bëhet më elastik, ky ushtrim i forcon edhe muskujt e prapanicës.

Për bel të hollë

Uluni mbi thembra, drejtojeni shpinën, ndërsa duart vendosni përpara jush, ashtu që majat e gishtave të prekin në dysheme. Pastaj lëvizni ijët përpara, me dorën e djathtë mbajeni këmbën e majtë, ndërsa duke e mbajtur dorën e majtë mbi kokë tërhiquni sa më shumë prapa. Pas 8-10 përsëritjeve në dy seri, ndërroni anët. Tendosja është pjesë përbërëse e ushtrimeve, ndërsa nëse e bëni rregullisht, ky ushtrim do të hollojë belin tuaj.

 

Categories
Lifestyle

Rikthimi në modë i fundit të shkurtër veref

Është shfaqur së shumti në pasarale dhe në tapetin e kuq, fundi i shkurtër dhe veref. Tashmë ka ardhur koha që ky lloj modeli të mos vishet vetëm nga modelet dhe aktoret, por edhe nga njerëzit e thjeshtë. Por, këshillohet nga stilistët që para se të aplikojmë në stilin tonë këtë lloj veshjeje, të ndjekim në fillim 5 rregullat. Ky lloj modeli është seksi pa qenë banal. Zbulimi i këmbëve, por vetëm një pjesë e tyre deri tek gjuri lejojnë veshjen e këtij lloj fundi nga të gjitha femrat. Fundi i shkurtër deri tek gjuri në formë verefi ka mbizotëruar në të gjitha sfilatat e pranverë/verë 2012, dhe po përhapet nga dita në ditë në të gjithë rrugët e botës. Sigurisht që nuk është një risi, por dihet që në modë modelet rikthehen në çdo kohë. Më konkretisht ky lloj modeli është pjesë e viteve 40 dhe është bërë i famshëm fal Christian Dior dhe koleksionit të tij të ri “New look”.

Për të ndjekur këtë tendencë mjafton të ndiqen 5 rregullat e mëposhtme:

1-Gjatësia. Gjuri është kufiri për të caktuar gjatësinë e këtij fundi. Stilistët këshillojnë që është më mirë që fundi të jetë poshtë gjurit dhe të duket kavilija e këmbës.

2-Materiali. Për të ndjekur modën e duhur është tepër e rëndësishme që materiali i fundit të jetë pak i ngurtë (jo shumë). Perfekt për këtë lloj modeli do të ishte kanavacja, pambuku për modelet më të përditshme. Ndërsa materiali i mëndafshit është perfekt për mbrëmje.

3-Ngjyra. Nuancat e pastelit janë tendencat e kësaj pranvere dhe janë perfekt për këtë stil veshjeje, përmendim këtu ngjyrën jeshile mente, të verdhën dhe ngjyrën e kuqërremtë. Por edhe ngjyra e zezë është e përjetshme dhe nuk ikën kurrë nga moda, ndërkohë që do të ishte perfekte për modelin e këtij lloj fundi por me pala, ndërkohë që format grafike janë më moderne dhe aktuale.

4- Për kombinimin e këtij lloj fundi nevojitet thjesht një këmishë, sepse e bukura e këtij modeli është fakti se është protagonisti i lookut tonë.

5-Në fund, asnjëherë nuk duhen harruar këpucët ose sandalet me taka të larta e të hapura. Por duhet të kini kujdes në përdorimin e këpucëve në formë balerine, sepse nuk dhurojnë pamjen perfekte dhe mbi të gjitha nuk shkojnë aspak me fundin e shkurtër në formë verefi.

Categories
Lifestyle Shëndet

Vrapi? Një ilaç i vërtetë, nëse bëhet mirë. Këshilla për ata që vrapojnë

Të vraposh më pak se 15 kilometra në javë është një mundim që shkon kot: aktiviteti fizik është shumë i paktë për të aktivizuar mekanizmat që të mbrojnë nga arterioskleroza dhe sëmundje të tjera të zemrës. Por nëse distanca dyfishohet, pra nëse ju impenjoheni për të vrapuar për një orë tre herë në javë, në gjak zhvillohet një revolucion i vogël: Kolesteroli i keq zvogëlohet në favor të kolesterolit të mirë, presioni i gjakut ulet, ulet edhe glicemia, por mbi të gjitha akumulimet e yndyrës në gjak ndalohen. Praktikisht arterioskleroza dhe rreziku i infarktit reduktohen mjaft. Nëse më pas impenjimi juaj rritet dhe distanca që përshkoni bëhet rreth 75 kilometra në javë, ose më mirë rreth një orë vrap në ditë, rreziku për shqetësimet kardiake përgjysmohet.

Në konkluzione të tilla kanë arritur studimet e zhvilluara në “Center for Health Promotion & Education” (Qendra për Promovimin e Shëndetit dhe të Edukatës) në Atlanta. Dhe këto të dhëna të gërshetuara edhe më studime të shumta të tjera, të çojnë në përfundime të reja dhe të panjohura më parë: çdo minutë në jetë e kaluar duke vrapuar shton tre minuta jetëgjatësi.

Po aq interesante janë rezultatet e studimit që evidentojnë se kur vrapi parandalon dhe kuron osteoporozën, një sëmundje që godet më shumë gratë pas menopauzës, duke i bërë kockat e tyre më të dobëta dhe kështu, më të predispozuara për fraktura. Pra, rezistenca e kockave të grave qe kanë vrapuar gjithmonë rezulton 40 për qind më e madhe se tek ato gra të cilat kanë zhvilluar një jetë sedentare. Një vlerë, vërtet e konsiderueshme. Atëherë më ardhjen e kësaj stine të bukur, do t’u bënte mirë të gjithëve që, pasi të jeni konsultuar me mjekun, të vishni atletet dhe me një vullnet edhe më të fortë, të nisni të bëni pasditeve vrap.

Kilogramët false, ato reale dhe kilogramët e rrezikshme

Po, por duhet të dini se kilet që mund të humbisni duke vrapuar janë të tre tipeve të ndryshme: reale, falsë e për fat të keq edhe të rrezikshëm. Kilet reale, më të vështirë për t’u eliminuar janë të përbërë nga dhjami i tepërt. Në çdo kilometër të përshkuar me vrap, digjen rreth 70 kalori. Duke qenë se çdo gram dhjam i korrespondon 9 kalorive, rënia reale e peshës për çdo kilometër është 7.7 gramë. Pak në të vërtetë . Po si ndodh që pas një ore vrapim në mënyrë të veçantë kur temperatura është e lartë, kilet e humbura mund të jenë edhe dy ose tre? Bëhet fjalë për kile false, që vijnë nga uji që del me djersën dhe nga harxhimi i karbohidrateve të grumbulluara në muskuj në formën e glikogjenit. Janë kile, të cilat merrem sërish duke pirë ujë dhe për shkak të oreksit që hapet për të ngrënë. Për fat nëse vrapimi praktikohet me rregull, le të themi për një orë tre herë në javë, që pas muajit të parë pesha trupore zvogëlohet duke mbajtur këtë tendencë. Por le të vijmë në fund tek kilet e rrezikshme. Janë kilet që mund të humbasë një person që është i dobët shumë dhe që për të vrapuar është i detyruar të djegë proteinat e muskujve. Një rrezik të cilin duhet ta kenë në qendër të vëmendjes në mënyrë të veçantë atletët.

Këshilla për femrat që vrapojnë

Zonjusha dhe zonja, nëse vraponi bëni mirë të vishni reçipeta. Mjekët e Universitetit të Portsmouth, duke analizuar në mënyrë tredimensionale lëvizjen e gjoksit gjatë vrapimit, kanë arritur në përfundimin se spostimet shkojnë mesatarisht 9 cm për një hap-vrap. Për çdo milje të përshkuar, gjoksi zhvendoset me rreth 135 metra. Duke pasur parasysh se gjoksi peshon mesatarisht 200-300 gramë, këto spostime mund të krijojnë një stres të madh për lëkurën, tërheqje të shtresave të shoqëruara me dhimbje të atyre që ne në gjuhën popullore u themi “këputje mishi”. Natyrisht që edhe pasojat estetike janë të padëshiruara. Dëmtimet, sipas drejtoreshës së studimeve, Joanne Scurr — evitohen duke veshur reçipetat klasike që reduktojnë rreziqet në 38 për qind dhe më mirë akoma do të ishte nëse përdoret recipeta sportive me siglën “shock absorber”, që reduktojnë tronditjet e gjoksit deri në 78 për qind.

Efektet e vrapimit në organizëm

Për trurin: Vrapimi stimulon në nivelin cerebral prodhimin e endorfinave, substance që, duke dhënë ndijime të njëjta me ato të morfinës, ulin perceptimin e dhembjes, reduktojnë efektet negative të tensionit nervor dhe për pasojë përmirësojnë tonin e humorit

Për zemrën: Vrapimi përmirëson eficencën e qarkullimit të gjakut dhe të punës së zemrës. Gjatë ushtrimit fizik, në fakt, hyjnë në qarkullim substance që kanë një efekt zgjerues për enët e gjakut si adrenalina dhe noradrenalina. Pra rezistenca e gjakut kur takon muret e enëve është e vogël, me efekt uljen e tensionit të gjakut.

Për aparatin tretës: Duke vrapuar, rregullohen funksionet e aparatit tretës edhe sepse me një aktivitet fizik konstant, qendra cerebrale e urisë tenton të ekuilibrohet, gjë që çon në kërkesën për një ushqim më të mirë me një sasi më të ulët.

Për kockat: Vrapimi ka treguar se është një ushtrim fizik shumë i mirë për të mos ndjerë pasojat e reduktimit të mineraleve në kockave që çojnë në brishtësinë e tyre, në mënyrë të veçantë nga gratë me moshë 35-40-vjeçare dhe sidomos tek ato pas menopauzës.

Për enët e gjakut: Për të përballuar kërkesën me oksigjen që kanë muskujt gjatë vrapimit, enët e gjakut e në mënyrë të veçantë ato periferike, zgjerohen dhe zhvillohet, duke përmirësuar qarkullimin e gjakut, vrapimi është armik i celulitit.