Prodhuesi gjerman i veturave, BMW, i ka prezantuar modelet e reja M3 dhe M4 Coupe. Ato kanë performancë të njëjtë dhe nuk dallojnë shumë as në dizajnin e jashtëm.
Këto modele kanë trup më të gjerë te rrotat në krahasim me modelet standarde josportive të Serisë 3 dhe Serisë 4, shkruan Autocar, transmeton Gazeta Express.
BMW M3 Saloon
Modelet do të kenë motor me vëllim 3.0 litra, i cili prodhon 473 kuaj-fuqi. Njësoj si me modelet X3 M dhe X4 M, modelet M3 dhe M4 do të jenë të qasshme edhe në variantin Competition, i cili pritet të ketë rreth 500 kuaj-fuqi.
BMW M4 Coupe
Për herë të parë në modelin M3, personat e interesuar për blerjen e veturës mund ta porosisin edhe variantin me tërheqje me katër rrota. Raportohet se kjo do të jetë gjenerata e fundit e modeleve sportive pa rrymë dhe vetëm me benzinë për shkak të objektivit për zvogëlimin e gazrave të karbonit.
Brendësia e modelit BMW M4 Coupe
Nuk ka hollësi të konfirmuara për performancën e shpejtësisë, por modelet që janë më të lehta dhe më të fuqishme se modeli M3 CS pritet të jenë më të shpejta se 3.9 sekonda për arritjen e shpejtësisë nga 0 deri në 100 kilometra në orë.
Veturat do të shiten me zgjedhje mes ndërruesit manual me gjashtë shpejtësi ose ndërruesit automatik me tetë shpejtësi.
Diesel ikën, hibridi vjen: me versionin e elektrifikuar, modeli suv japonez përshëndet një herë e përgjithmonë motorin me naftë, por mbetet njësoj e ekuilibruar, të paktën në qytet
Duke perifrazuar një reklamë komerciale të famshme, modeli i ri CR-V Hybrid, i ka thënë jo motorit me naftë dhe po elektrifikimit. Një gjë e tillë është plotësisht në përputhje me strategjinë e kompanisë, e cila do të braktisë përgjithmonë motorin me naftë brenda vitit 2021, duke e zëvendësuar atë me një gamë motorësh hibridë dhe plug-in (së shpejti do të kemi debutimin e modelit elektrik të pastër). Në shënjestrën e kompanisë japoneze bën pjesë një tjetër model suv me motor të dyfishtë: bashkëkombësja Toyota RAV4, e ngjashme në përmasa dhe filozofi. Brenda kofanos së modelit suv Honda, që ka dalë në treg në muajin shkurt, përfshihet një motor elektrik me 184 kf dhe 315 Nm, si dhe një motor dylitërsh me benzinë, me 145 kf dhe 175 Nm. Tre janë modalitetet e funksionimit, të përzgjedhura në mënyrë automatike nga vetë makina. EV (ecje 100% elektrike, me dy kilometra autonomi), hibrid – katërcilindërshi shkëputet nga rrotat dhe vë në punë alternatorin i cili ushqen motorin elektrik – dhe endotermik. Në thelb, megjithatë, makina shfrytëzon më tepër motorin me emisione zero, krahasuar me sistemet hibride të konkurrencës: motori dylitërsh, në fakt, përdoret kryesisht për të gjeneruar energji elektrike. Pra, është pothuajse gjithmonë elektriku që shtyn makinën, përveç rasteve kur kërkohet performancë maksimale.
SI REDUKTOHET ZHURMA
Nëse nuk teprohet me gazin dhe ecet me shpejtësi konstante, motori elektrik nxjerr në pah anët e veta më të mira: ai shpërndan gatishmëri dhe një moment përdredhës të fuqishëm, të mbështetur nga motori termik. Nga ana tjetër, ky i fundit përpiqet maksimalisht, duke punuar në regjime të larta e duke rritur zhurmën në mënyrë të pashmangshme, sidomos në shpejtësi të qëndrueshme. Përshtatja e një pajisjeje për zvogëlimin e zhurmës, si dhe materialet izolues shtesë, megjithatë, e bëjnë modelin CR-V Hybrid po aq mirë të pazhurmë. Për të rritur edhe më shumë komfortin, luan rol edhe kalibrimi i strukturës, të mbështetur mjaft mirë. Në modalitetin hibrid, konsumet nuk janë keq në qytet (rreth 16 km/litër tregon kompjuteri në kabinë), por në autostradë, ulet në 12 km për litër. Çmimi? Fillon nga 32.900 euro, shifër që përfshin frenimin automatik emergjent me njohjen e këmbësorëve, ruajtjen e korsisë dhe pajisjen cruise control me përshtatje. Në seri janë edhe disqet 18 inç, paralajmërimi për këndet e errët, fenerët plotësisht Led dhe instrumenti dixhital 7 inç. Për të pasur traksionin integral është i detyrueshëm konfigurimi Elegance Navi: me të vlera arrin 38 mijë euro.
HYBRID FWD
Të dhëna teknike
Motori
L4 benzinë
Cilindrata 1.993 cm3
Fuqia maksimale 107 kW (145 kf) në 6.200 xhiro/min
Momenti përdredhës maksimal 175 Nm në 4.000 xhiro/min
Motori elektrik, 135 kW (184 kf) dhe 315 Nm
Transmisioni
Traksion në rrotat e para
Reduktor me raporte fiks
Performanca
Shpejtësia maksimale 180 km/h
0-100 km/h 8,8 s
Përshkueshmëria mesatare 18,9 km/l
Përmasat dhe pesha
Hapi 266 cm
Gjatësia 460 cm
Gjerësia 190 cm
Lartësia 168 cm
Pesha 1.614 kg
Çmimi
duke filluar nga 32.900 €
TEKNIKA
BЁN EDHE PA KAMBIO
Sistemi hibrid i modelit Honda quhet i-Mmd, akronim i Inteligjent Multi Mode Drive: ai kombinon një motor endotermik dylitërsh, me cikël Atkinson i cili vë në punë gjeneratorin, një motor elektrik kompakt, që lëviz rrotat dhe baterinë me jone litiumi 1,4 kWh. Alternatori furnizon me energji elektromotorin dhe ngarkon akumulatorin, ndërsa në shpejtësi të larta, motori me benzinë, mund të tërheqë drejtpërdrejtë rrotat kur friksioni i vendosur mes tyre ndërpritet. E gjithë kjo realizohet pa kambio, që është zëvendësuar nga një reduktor me raport fiks. Sipas kërkesës, mund të kemi traksion integral me boshtin klasik të transmisionit, i cili mund të spostojë në aksin prapa deri në 60% të momentit përdredhës.
Pas timonit janë vendosur dy përzgjedhës për të rregulluar ngadalësimin rigjenerues: me rritjen e ngadalësimit, shtohet energjia e rikuperuar dhe e ruajtur në akumulator. Në kalimin e gjeneratës, CR-V, ka fituar plot 3 cm në hap, të gjitha në të mirë të hapësirës së brendshme, të barabartë me atë të versionit me benzinë: versioni hibrid, megjithatë, ofron më pak hapësirë tek bagazhi, nga 561, ofron 497 litra, për shkak se i ka krijuar vend baterive. / Revista Autoclub
Kudo luksi ndërthuret me një frymë absolute teknologjike, duke përfshirë të gjitha aspektet e këtij modeli. Duke filluar nga siguria. Po për sa i përket drejtimit autonom të premtuar? Për momenti ligji aktual nuk e lejon.
Netë të shumta pa gjumë, studime intensive të thelluara, vetëm për të qenë të parët që sjellin në duart e klientit një automjet të vetëdrejtueshëm, më pas, në dukje të vijës së finishit, zbulohet se nuk mund të bëhet. Është gati drejtimi autonom i Nivelit 3 (shkalla e parë e klasifikimit Sae), por nuk mund të bëhet asgjë. Arsyeja: mungesa e një normative ligjore të përshtatshme. Si të thuash që ritmet e institucioneve ligjore janë më të ngadaltë se ato të zhvillimeve teknike. Asgjë për t’u habitur, por praktikisht rezultati është që fryti i shumë viteve kërkime nuk mundet (momentalisht) të qarkullojë në rrugët publike.
Krahas kësaj, Audi ka shumë për të shprehur: edhe me një drejtim të asistuar të rëndomtë (të rëndomtë, sepse kur arrin një nivel të caktuar, çdo gjë tjetër duket sikur është pak, për të mos thënë asgjë), kjo super veturë nga Ingolstadt shpalos një plotësi, e cila, pa riprojektuar as konfigurimin e përgjithshëm, as misioni primar, arrin t’i dërgojë parametrat në një nivel më të lartë. Pastaj nuk duhet harruar: me këtë kontakt të parë me drejtimin autonom nuk duhet shfrenuar shumë fantazia. Si shpjegohet me detaje në faqet në vijim, ky model Audi nuk do të jetë ai që të dërgon në punë vetë. Për të tilla skenare, është akoma herët. Gjithsesi, kur të mbërrijë AI (Artificial Intelligence, emërtimi që përfshin të gjithë teknologjitë më të avancuara të modelit A8), nuk do të jetë në asnjë rast i përditësueshëm në modele të cilët do të gjenden në qarkullim.
Nuk mbetet gjë tjetër tashmë veçse të zbulojmë çfarë na rezervon modeli që kemi për momentin, i cili të paktën ka privilegjin të na prezantojë drejtimin e kompanisë për vitet në vijim: si të themi disa nga gjërat e pranishme në këto faqe do ta rishohim në gjeneratat e radhës të modeleve A3 dhe A4.
DY EKRANE
Shtrirja lineare dhe e rregullt, tipike e një Audi, shumë larg nga elementët e shumtë të një modeli Mercedes S-Class, i jep jetë një kombinimi që të kujton një model lounge. Në këtë ndikojnë materialet, stili, saktësia e realizimit të përgjithshëm, por edhe (ose mbi të gjitha, për ecurinë e kohërave) disponibiliteti teknologjik, si teknologjitë e dedikuara për drejtimin apo ato për argëtimin e pasagjerëve fatlumë. Mbase nuk mund të konsiderohet si një hap përpara zhdukja e rrotullës mbi kroskot, por vendosja e re me dy ekrane ka një impakt të pamohueshëm. Nuk është një risi absolute, prania e dy ekraneve, sepse ka debutuar tek modeli Range Rover Velar, por tek modeli A8 është bërë akoma më bindëse në sajë të shpejtësisë së përgjigjes së sistemit. Thuajse gjithçka është mbledhur këtu dhe sado është e realizuar puna e racionalizimit dhe thjeshtësimit nga ana e teknikëve gjermanë, në disa raste arrihet deri aty sa i ndjehet mungesa butonave tradicionale fizike. Të cilat gjithsesi në rast të kundërt do të ishin më të shumtë në numër se ato të pranishëm në kabinën e pilotimit të një 747, nëse merret në konsideratë shumëllojshmëria e funksioneve që do menaxhohen.
Prapa, hapësira për këmbët nuk është shumë e ndryshme nga ajo e një modeli Skoda Superb, të paktën në ekzemplarin e provuar (për versionin me hap të gjatë, që arrin deri 5.30 metra, sigurisht vlerësimi është i ndryshëm). Gjithsesi, kabina e modelit A8 është një vend i mirë për të ndenjur, në rastin e modelit të provuar, sigurisht është përmirësuar akoma më tepër falë pranisë së mbi 50 mijë euro aksesorë, një pjesë e madhe e të cilëve të dedikuar për detaje që rrisin nivelin e eksperiencave të përjetuara në bord: çështje perceptimi (lëkurat, shpërndarësi i parfumit) dhe ndjesish të vërteta, si në rastin e sediljeve Confort të pajisura me shtatë tipe masazhesh.
SJELLJE E PANDRYSHUAR
Pas kalimit të hapit të përzgjedhjes midis varianteve Stretch apo Vitalizzante, jemi gati për nisje. Me pasagjerët prapa të zënë me të tjera “shqetësime”: nga përzgjedhja midis televizorit apo muzikës, tek përcaktimi i profilit të sediljes, si për sa i përket rregullimit të seksioneve ashtu edhe për masazhin. Ndërsa, për pasagjerin e djathtë, është e disponueshme edhe ngrohja për këmbët. Një skenar që do të meritonte formën më perfekte të autonomous drive, shoferin. Megjithatë, edhe pa të, nuk mund të ankohen: skema me katër rrota drejtuese rrisin manovrueshmërinë e modelit edhe për shpejtësi të ulëta, por në fund të fundit bëhet fjalë thjeshtë për detaje, sepse është në rrugëtimet e gjata aty ku kjo gjermane e shpreh tërë potencialin e disponueshëm. Sipas terrenit, merret ndjesia sikur mund të udhëtohet i pa shqetësuar dhe ndërmarrja e kësaj aventure ka hijeshinë e saj: të vendosur në sediljen e shkëlqyer Confort (opsional, gjë që lidhet me informacionet e mësipërme), me motorin në nivelin e 1.600 xhirove arrihet një heshtje thuajse absolute, ndjesia e mirëqenies është totale dhe kjo në sajë të detajeve në dukje jo ndikues, si stili i veshjes së brendshme apo harta e navigatorit tek instrumentet. Gjëra të vogla, por kjo e fundit, me larminë e saj të informacionit, ndikon që drejtuesi të ndjehet më i sigurt dhe i lirshëm.
MOTOR I SHKËLQYER
Nuk arrihet ajo ndjesia prej tapeti fluturues të një Mercedes S-Class (faktikisht, udhëtimet në autostrada ndjehen minimalisht), por nuk prish shumë punë: në këmbim merret një precizion drejtimi dukshëm më i lartë. Dhe falë sistemit Mild hybrid prej 48 volt, arrihet të përdoret edhe në shpejtësi të larta: nuk mjafton që të klasifikohet si një hibride e vërtetë, por konsumet me siguri e ndjejnë. Edhe në kontekstin e performancave, motori tre litra TDI bën një paraqitje të mirë: në vijim do të mbërrijnë motorë me fuqi më të lartë, por modeli A8 lëviz gjithmonë me një ekuilibër perfekt midis një rrjedhshmërie të lartë dhe cilindratës së madhe. Në fund të fundit, është pikërisht ajo që nevojitet për personalitetin e këtij modeli.
INFOTAINMENT / ARRIHET THUAJSE TEK DIALOGU
Impiant i një niveli të lartë, si për sa i përket realizimit ashtu edhe lehtësisë së përdorimit në raport me potencialet e përgjithshme, gjë që shënon edhe një ndryshim drejtimi të rëndësishëm. Faktikisht, modeli i ri A8 ka hequr dorë nga rrotulla e zakonshme e pranishme mbi panel: një ndryshim i cili do të jetë i pranishëm edhe në modele të tjera të kompanisë, duke filluar nga modeli i ri A7. Në kontekstin e ndërlidhjes njeri/makinë, vlen të vlerësohet aftësia e teknikëve gjermanë për ta bërë të rregullt dhe lehtësisht të menaxhueshëm një realitet (virtual) të përbërë nga qindra, pse jo edhe mijëra paraqitje. Një punë me një ndikim të rëndësishëm, tek i cili janë lehtësuar edhe nga prania e dy ekraneve qendrore, element i cili mundëson të manovrosh me informacionet në një mënyrë më tepër praktike. Gjithashtu, ekranet janë të përbërë nga një feedback aptik: që nënkupton që çdo shtypje shoqërohet nga një reaksion i lehtë poshtë gishtit, i cili jep ndjesinë e shtypjes së një butoni të vërtetë fizik. Ndër të tjera, pavarësisht këtij funksioni, vëmendja e kërkuar (ashtu si me të gjithë sistemet touch) mbetet më e lartë se ajo e nevojshme për një impiant të pajisur me komanda në panelin qendror. Një diferencë e rëndësishme, duke qenë se lidhet drejtpërdrejt me sigurinë në drejtim, të cilën Audi e eliminon me komanda zanore të një cilësie të lartë. Sigurisht nuk bëhet fjalë për nivelin e Siri apo Google Now, por ndjesia që merret është sikur dialogimi me impiantin është i mundur: drejtuesi mund të bëjë kërkesa në mënyrë elastike, apo pa u shqetësuar që të respektojë disa sintaksa të paracaktuara.
DREJTIMI AUTONOM / NË AUTOKOLONË IA DEL E VETME
Design Sketch
Ajo që A8 do të autorizohet të bëjë në të ardhmen, kur AI Traffic jam pilot i drejtimit të automatizuar të nivelit të tretë do të homologohet dhe të lejohet nga Kodi rrugor, ishte e mundur të provohet fizikisht në një test të realizuar nga Audi në vjeshtën e kaluar. Për sqarim, nuk është se ka të bëjë me shtypjen e një butoni dhe makina të dërgon në destinacion: për këtë do të nevojitet akoma (shumë) kohë. Për herë të parë (dhe në kushte të caktuara) megjithatë është e mundur të hiqen duart nga timoni dhe larguar vështrimin nga rruga për të parë televizion apo gjëra të tjera në ekranin e bordit. Në sajë të 24 sensorëve, midis radarë, Lidar, ultratinguj dhe kamera, centralina e fuqishme e AI Traffic jam pilot, e pajisur me çipe Nvidia dhe Mobileye, është e aftë të kontrollojë atë që ndodh përqark automjetit dhe të dallojë ambientin rrethues. Kështu, nëse gjendet në autokolonë me shpejtësi midis 0 dhe 60 km/h në autostradë apo një superstradë pa semaforë, tek instrumentet shfaqet një mesazh që sinjalizon disponibilitetin e sistemit: duke shtypur butonin AI në panelin qendror, kuadri i instrumenteve ndryshon paraqitje dhe vetë makina merr drejtimin, duke ndjekur lëvizjen e automjetit që e paraprin dhe duke ruajtur gjithmonë të njëjtën korsi. Pas kësaj mund të qetësohesh dhe të mendosh për diçka tjetër, por jo të lexosh gazetë apo të flihet: një kamera ruan vështrimin e drejtuesit dhe nëse sytë e këtij të fundit janë të mbyllur apo nuk janë të dukshëm aktivizohet një sinjalizim për rimarrjen e drejtimit të automjetit. Nëse nuk respektohet, sinjalizimi bëhet më i fortë dhe nëse drejtuesi nuk reagon përsëri, A8 tendos rripin e sigurimit dhe bën tre frenime të lehta të njëpasnjëshme, sinjalizime këto të fundit të cilat është e pamundur të mos ndjehen. E njëjta gjë edhe në rasti kur humbasin kushtet në cilat makina mund të vetë drejtohet, p.sh. nëse makinat e tjera shpërndahen dhe nëse mund të tejkalohen 60 km/h. Në rastin në të cilin të gjitha sinjalizimet nuk do të merreshin në konsideratë, makina do të ndalonte në korsinë që po udhëton dhe në nuk do të merrte akoma përgjigje nga drejtuesi, do të niste një thirrje emergjence.
TEKNIKA / EFIÇENCË E LARTË
Modeli premium Audi është një koncentrat midis teknologjive aktualisht të disponueshme të kompanisë gjermane dhe është e pamundur që të gjitha të renditen në një hapësirë të vogël. Rikujtojmë vetëm që gjenerata e parë A8, e vitit 1994, ka prezantuar shasinë e aluminit në prodhimin e serisë dhe në versionin aktual përdoret çeliku për pjesët me më tepër sforcime, për të rritur rezistencën nëpër impiante janë përdorur edhe fibra e karbonit dhe magnezi. Gjithashtu ky model është i pajisur me një alternator prej 48 volt, të kombinuar me një bateri litiumi prej 10 Ah, që mundëson ushqimin në mënyrë efiçente të aparaturave elektrike me konsum të lartë, rikuperimin gjatë lëshimit të deri në 12 kW dhe të rindizet në mënyrë të shpejtë dhe të heshtur njësia V6 diesel. Në këtë mënyrë, motori mund të jetë i fikur ndërkohë që mjeti lëviz në shpejtësi midis 55 dhe 160 km/h, ndërsa gjatë afrimit nëpër semaforë arrin të fiket deri prej 22 km/h.
HAPËSIRA DHE SHIKUESHMËRIA
Kabinë përrallore. Përmasa minimale për hapësirën e disponueshme për këmbët e personave prapa gënjen: referohet për rastin kur sedilja e parë është e shtyrë deri në fund prapa dhe ndenjësja e pasme është e tërhequr plotësisht në mënyrë që të shtrihet mbështetësja e pasme.
BAGAZHI
Përmasa të mira dhe formë e rregullt, edhe pse kjo nuk e përjashton faktin se ndonjë litër më tepër do të ishte më se i mirëpritur, nëse merren në konsideratë përmasat e karrocerisë. Hapja dhe mbyllja e kofanos është elektrike (një domosdoshmëri, nëse merret në konsideratë kategoria…) dhe mbështetëset e pasme nuk e ofrojnë mundësinë e palosjes.
SIGURIA DHE ADAS / GJITHÇKA, MË TEPËR
Pajisjet teknologjike të modelit A8 nuk i tregojnë vlerat e tyre vetëm gjatë lëvizjes. Mburoja e këtij modeli mbetet aktive edhe kur automjeti është i parkuar: mjafton të mundohesh të hapësh derën në momentin e gabuar (p.sh. kur pranë makinës po kalon një çiklist), për të kuptuar se kjo gjë është e pamundur. Në të njëjtë kohë profili tek porta fillon të pulsojnë një dritë të kuqe, shoqëruar nga sinjalizimi pak më klasik i verdhë tek pasqyra (ai i cili, gjatë lëvizjes, sinjalizon praninë e veturave të tjera në këndin e errët). Vetëm koha që nevojitet për ta kuptuar dhe porta zhbllokohet, me çiklistin tashmë larguar. Pajisje të tilla si kjo (jo të panjohura, duke qenë se kanë debutuar tek Q7), shoqërohen me spektrin e sistemeve tashmë të njohur: megjithatë, asnjë model nuk i paraqet të gjitha së bashku, me një total prej dyzet të tillë. Ndër të tjera, A8 monitoron edhe makinat që afrohen kur ndalon në semafor: nëse sistemi dallon mundësinë e një goditjeje, tendos rripat e sigurimit, ndez sinjalet dhe bën gjithçka për të minimizuar pasojat e përplasjes. Një sistem vërtetë shumë i dobishëm, i cili në disa raste gjithsesi rezultoi disi pengues, duke realizuar gjithçka që u përshkua vetëm sepse, në pjesën e pasme të saj po afrohej një makinë që do të kthehej në një nga drejtimet anësore. Faktikisht, në këtë rast, afrimi është fatalisht më i shpejtë krahasuar me rastin kur vetë kjo makinë do të vendoste të futej në rresht. Sistemi, në atë moment, bindet se goditja është e pritshme dhe trembja është e pashmangshme: të gjendesh në atmosferën e këndshme të A8 me rripat që papritmas paratensionohen, sigurisht nuk është e këndshme. Një sakrificë e vogël për një siguri më të lartë.
VLERËSIMI / POZICIONI I DREJTIMIT
Sedilja, blloku i timonit dhe pedalet janë të pozicionuar me kujdes në raport me njëri-tjetrin dhe për të gjetur vendosjen e duhur nuk ka shumë rëndësi nëse drejtuesi është i gjatë apo i shkurtër. Në modeli e provë gjithçka përmirësohet falë sediljeve Confort.
KOMANDA DHE INSTRUMENTE
Teknikët gjermanë kanë punuar shumë për rikonceptimin e ergonomisë, duke e zhvendosur thelbin drejt virtualitetit. Gjithçka në rregull, megjithëse, disa veprime kërkojnë një nivel impenjimi më të lartë se ai i zakonshmi.
INFOTAINMENT
Sistemi Mmi touch response është një kombinim i një niveli shumë të lartë. Mungesa e rrotullës klasike mbi panel ndonjëherë detyron të hiqet vëmendja nga rruga, limitim i pashmangshëm për filozofinë “gjithçka touch”.
KLIMATIZATORI
Një impiant me menaxhim automatik me katër zona, i cili në ekzemplarin e provës ishte i pajisur me paketën Air quality (e cila përfshin aromatizim dhe jonizim). Prapa, shfryrësit arrijnë deri në katër të tillë.
SHIKUESHMËRIA
Arrin, të paktën pjesërisht, të bëjë të harrohen dimensionet e konsiderueshme të vetë karrocerisë së modelit. Kjo në sajë të kolonave anësore jo shumë të trasha dhe gjatë parkimit, falë elektronikës: shikueshmëria në 360 arrin të nxjerrë nga çdo situatë.
CILËSIA E MONTIMIT
Duke marrë në konsideratë markën, rangun dhe shifrat për të cilat bëhet fjalë, pritshmëritë janë shumë të larta. Janë plotësuar: stili, materialet dhe realizimi janë i një niveli shumë të lartë. Nuk mund të gjenden parregullsi as në detajet e detajeve.
AKSESORËT
Baza është shumë e mirë. Kjo nuk i pengon marzhet shumë të zgjeruara të personalizimeve: kjo reflektohet edhe në mbi 50 mijë euro elementë opsionalë të ekzemplarit të provës. Për më tepër, të cilat nuk mjaftojnë për ta quajtur full optional.
PAJISJET E SIGURISË
Repertor jashtëzakonisht i gjerë, sigurisht me bazë elektronike. Sasia e pajisjeve që i bëjnë udhëtimet e sigurta është thuajse e panumërt. Gjithashtu, iu mbron edhe të ndaluar, si në rastin e vonesës së hapjes së dyerve.
ASISTENCA NË DREJTIM
Në pritje që hapi i parë i drejtimit autonom të mirëfilltë të mund të jetë i pranishëm në duart e publikut, A8 ofron një drejtim të asistuar shumë të mirë realizuar, realisht të aftë për t’i bërë udhëtimet e gjata më të rehatshëm dhe të sigurt.
HAPËSIRA
Hapësira sigurisht është më se e bollshme, si para ashtu edhe prapa. Në këtë model mund të zgjaten këmbët dhe një pasagjer i tretë i mundshëm nuk është shumë i mirëpritur, më tepër për çështje atmosfere dhe jo për shkak të mungesës së centimetrave.
BAGAZHI
Hapësirë me përmasa të mira, me një kapacitet real shumë të afërt me atë të deklaruar: 494 litra. Kapacitet interesant, i cili megjithatë gjatë udhëtimeve të gjata, i detyron katër pasagjerët në një farë mënyre të sakrifikojnë disi.
KOMFORTI
Tek A8 zhurmat dhe dridhjet e forta filtrohen më së miri dhe në kabinë mbizotëron një qetësi dhe komoditet i lartë. Detaje të shumtë nga pajimi deri tek tapiceria, merren pastaj me amplifikimin e këtyre ndjesive të cilat mund të përcaktohen si bazë.
MOTORI
Evolucioni i radhës i njësisë gjashtë cilindra prej tre litra. Punon në mënyrë të rregullt me një homogjenitet që në këtë lloj automjeti është një domosdoshmëri. Dhe kur provohet të shfrytëzohet plotësisht, përgjigja është bindëse.
PËRSHPEJTIMI
Pesha e konsiderueshme nuk e tremb aspak modelin A8, i cili fiton shpejtësi pa asnjë lloj pasigurie. Dhe bukuria qëndron në ndjesinë që gjithçka ndodh pa sforcimin më të vogël. Shifra në të njëjtat nivele me modelin analog BMW 730d.
RIMARRJA E SHPEJTËSISË
Edhe në këtë rast krahasimet paralele me modele të tjerë mund të jenë të njëjtë. Meritë kjo e sasisë së madhe të momentit përdredhës me të cilin kambio bën ndryshimin e të gjithë marsheve të nevojshme.
KAMBIO
Varianti ZF me tetë marshe është i shpejtë aq sa nevojitet për këtë lloj automjeti, por mbi të gjitha bën të harrohet prania e tij: ndryshimet e marsheve ndjehen më tepër nga ndryshimi i lehtë i tingullit të motorit.
SISTEMI I DREJTIMIT
Ka një karakter që kombinohet në mënyrë të përsosur me atë të vetë modelit dhe në të njëjtën kohë, ndihmon ta përcaktojë atë. I lehtë aq sa nevojitet, është i përpiktë dhe progresiv. Dhe është gjithmonë i lehtë për t’u interpretuar.
FRENAT
Arrijnë të përballojnë dy tonelata pa bërë përkuljen më të vogël. Kapacitet frenues i një niveli të lartë, por edhe një rezistencë ndaj lodhjes të shkëlqyer. Thjesht distanca disi të gjata në asfalt të lagur/akull.
SJELLJA DINAMIKE
Interpreton në mënyrë të përkryer rolin e saj prej super veture. Gjithashtu, shpalos një qetësi të padiskutueshme sa herë që nevojitet të ndryshohet drejtimi. Detaj i cili mbetet përsëri i njëjtë edhe në rastin e situatave të emergjencës.
KONSUMI
Rezultate të shkëlqyera dhe në thelb, të njëjta me ato të modelit 730d: mesatare e përgjithshme prej mbi 13 kilometra me një litër, e cila për automjetet e kësaj kategorie është më se ekonomike. Serbatori prej 82 litra: është një opsional i falur.
ANË POZITIVE
Niveli teknologjik. Edhe në kuadrin e zhvillimeve të ardhshme, A8 shpalos një nivel plotësie që e shndërron në një pikë referimi të vërtetë.
Ekzekutimi i brendshëm. Stili dhe realizimi: edhe në këtë kontekst, ky model Audi i rrit akoma më tepër kërkesat.
ANË NEGATIVE
AI i papërditësueshëm. Siç përmendëm oferta teknologjike është e një niveli absolut. Mirëpo, është një fatkeqësi që tek A8, pas blerjes nuk është i mundur upgrade. Me detajet e pritshme në momentin e rishitjes.
Rreth një dekadë më parë, Elon Musk themeloi Tesla me synimin për të përshpejtuar kalimin drejt makinave elektrike. Sot, kjo dëshirë e tij po kthehet në konkurrencë për prodhuesin amerikan të automjeteve.
Duke nisur me Jaguar I-Pace dhe më vonë gjatë vitit Audi e-tron, tashmë të gjithë prodhuesit e mëdhenj të makinave po nxjerrin nga një model sportiv dhe me stil të automjeteve elektrike, duke sfiduar Modelet S, X dhe 3 të Teslas.
Por, ndryshe nga Tesla, këto kompani kanë gati një shekull eksperiencë në linçimin e modeleve të reja çdo disa muaj dhe mund t’i shpërndajnë kostot e prodhimit në një portofol shumë më të gjerë, shkruan scan.tv. “Automjetet që kam parë janë më superiore se çdo gjë që ofron Tesla. Ata po kalojnë masivisht larg investimit në diesel drejt elektrifikimit, duke prodhuar si automjete vetëm elektrike, ashtu edhe hibride me elektricitet”, u shpreh drejtuesi i kompanisë amerikane të tregtimit të automjetve AutoNation, Mike Jackson, duke iu referuar prodhuesve gjermanë.
Konkurrenca nga Gjermania vjen në një moment të vështirë për Teslan, kur kompania ende nuk arrin të nxjerrë fitime dhe raportoi 1 miliardë dollarë shpenzime për tremujorin e parë të vitit. Teksa Musk është zotuar të zgjidhë problemin e linjave të prodhimit të kompanisë, kyçe për të filluar shitjen në masë, ai gjithashtu nuk u ka dhënë përgjigje analistëve në lidhje me çështjen.
Edhe pse fuoristrada I-Pace e anglezëve të Jaguar ka nisur shitjet që nga muaji i kaluar, sfida më e fortë për Tesla do të vijë nga Gjermania. Një mori me modelesh pa karburant po i drejtohen showroom-eve, që nga Volkswagen I.D. family, e orientuar drejt familjeve dhe tregut të gjerë, e deri tek Mercedes EQ C dhe Porsche Mission E, të cilat vijnë vitin e ardhshëm. Porsche madje rriti parashikimet, duke thënë se shitjet e makinave elektrike dhe atyre hibride me bateri do të zënë gjysmën e dërgesave të këtij prodhuesi deri në vitin 2025.
Megjithatë, Tesla pritet të mbetet një fuqi në tregun e automjeteve elektrike. Amerikanët janë këmbëngulës dhe nuk po tregojnë ndonjë shenjë të heqjes dorë. Ata janë nisur më herët në këtë treg dhe konkurrenca e re nuk e zhbën dot Teslan.
Ndërkohë që teknologjia e makinave mund të ketë hyrë në hapa të mëdhenj në dy dekadat e fundit, ende ekziston një gjë me të cilën shpesh shoferët ballafaqohen gjatë dimrit.
Deri tani ju keni ndezur makinën dhe më pas e keni lënë deri sa të nxehej motori e automjeti. Por kjo nuk është një gjë aspak e mirë për automjetin tuaj.
Kjo periudhë në fakt vetëm sa zgjat periudhën e ngrohjes shkruajnë Road & Track.
Njohuria konvencionale që juve iu duhej disa minuta derisa makina të arrinte një temperaturë të caktuar për të punuar në mënyrë optimale vjen që prej kohës së karburatorit.
Por tani në përgjithësi makinat nuk e kanë më këtë problem, transmeton oranews. Duke qenë se motorët sot punojnë me lëndë djegëse të injektuara janë të dizenjuara që të ndizen e të ecin menjëherë.
Lënia e makinës ndezur për të nxehur motorin mund të shkaktojë hollimin e vajit të motorit dhe shkatërrimin e tij.
Provoni dhe na tregoni përvojat tuaja, thonë që vërtet ka sukses.
Gërryerja monotone e akullit nga xhami i shoferit dhe ngrirja mund të bëhen me ndihmën e kësaj metode të shpejtë dhe të thjeshtë!
Fjala është për trukun i cili do t’ia lehtësojë jetën çdo shoferi, sepse me ndihmën e tij akulli nga xhami i shoferit do të zhduket për një minutë.
E gjitha që ju nevojitet është një shishe plastike me spërkatës në të cilin duhet të perzieni 2/3 alkool, 1/3 ujë dhe një lugë detergjent për larje enësh.
Tundeni shishen që të gjithë përbërësit të bashkohen, spërkatni xhamin e ngrirë dhe akulli do të shkrihet për një minutë.
Ishte një tren pasagjerësh që lidhte Parisin me Stambollin. Rrugën e parë e kreu në 4 tetor 1883 dhe parashikonte disa ndërresa. Mes dy luftërave botërore ka patur tre linja paralele pa ndërresa, teksa njëra prej tyre shkonte deri në Londër. Treni pati një sukses shumë të madh falë komoditetit të vagonëve, luksit dhe shërbimit fantastik të restorantit. Në vitet Pesëdhjetë shërbimi rifilloi, por me mbylljen e kufirit mes Jugosllavisë dhe Greqisë, itinerari u desh të ndryshojë, teksa avioni po bëhej gjithnjë e më i preferuar si mjet transporti.
Në 14 dhjetor 2009, pas shumë ndryshimeve me kalimin e viteve, “Orient Ekspres” i ndal përfundimisht, por magjepsja prej tij ka mbetur në libra dhe filma të pafundëm./Bota.al
Flet ministri i Turizmit dhe Mjedisit, z. Blendi Klosi
Është e patolerueshme që Shqipëria të vazhdojë të mbushet me makina që janë afër fundit të jetës së tyre. Ministri i Turizmit dhe Mjedisit, z. Blendi Klosi, thotë në një intervistë të posaçme për “Monitor” se rinovimi i strukturës së mjeteve duhet të shkojë paralel me nxitjen e masave për importimin e mjeteve Euro 4, Euro 5 dhe 6 dhe për të përmirësuar cilësinë e karburantit që tregtohet në Shqipëri, rritjen e ndërgjegjësimit publik, nxitjen e iniciativave ekonomike të transportit publik dhe atij ekologjik, nxitjen e investimeve private në transportin publik.
Ministri Klosi shton se brenda 6-mujorit të parë 2018 do të hyjnë në fuqi rregullat e reja, sipas të cilave lejohen të importohen në Republikën e Shqipërisë vetëm mjetet motorike, që plotësojnë standardet Euro 5 të shkarkimeve në ajër; dhe mjetet ekzistuese, shkarkimet e të cilave iu përkasin standardeve Euro 1 (viti i prodhimit 1993-1994) dhe Euro 2 (viti i prodhimit 1997), duhet të marrin masat për arritjen e standardit Euro 3.
Këto propozime ishin parashikuar që të hynin në fuqi që në 1 janar 2017, por për shkak se nuk kaloi në kohën e duhur, tashmë duhet të rishikohen datat.
Si do të nxitet përdorimi i mjeteve që nuk ndotin mjedisin?
Si fillim, doja ta vija theksin se jo vetëm makinat, por çdo nismë që shkon në përmirësim të situatës së ndotjes mjedisore, do të nxitet fort nga Ministria e Turizmit dhe Mjedisit. Prej marrjes së detyrës nisëm punën për analizën e situatës dhe gjetjes së zgjidhjeve të pranueshme që shkojnë në drejtim të synimit madhor, mjedisit të shëndetshëm. Për të gjitha sipërmarrjet, bizneset, kompanitë që punojnë në Shqipëri është kërkuar dhe do të vijojë të kërkohet zbatimi i lejeve mjedisore, standardeve mjedisore. Koha kur mjedisi trajtohej si malli pa zot, pasuria e të gjithëve dhe përgjegjësia e askujt ka marrë fund.
Politikat, ndryshimet e legjislacionit dhe kontrolli do të jenë rigoroz. Ndaj dua që edhe në këtë hapësirë komunikimi me qytetarët, të bëj apelin të merren masa për respektim të standardeve mjedisore. Në këtë kuadër, edhe nxitja e përdorimit të makinave që ndotin sa më pak mjedisin si dhe rinovimi i strukturës së mjeteve në vend, do të jenë pjesë e diskutimeve në masat fiskale lehtësuese.
Rinovimi i strukturës së mjeteve duhet të shkojë paralel me nxitjen e masave për importimin e mjeteve Euro 4, Euro 5 dhe 6 dhe për të përmirësuar cilësinë e karburantit që tregtohet në Shqipëri, rritjen e ndërgjegjësimit publik, nxitjen e iniciativave ekonomike të transportit publik dhe atij ekologjik, nxitjen e investimeve private në transportin publik.
Të dhënat zyrtare tregojnë se në Shqipëri, mosha mesatare e makinave është mbi 20 vjet, shumë më e lartë se mesatarja e Europës prej 10 vitesh. Çfarë masash do të ndërmerrni për të nxitur përdorimin e makinave të reja?
Është e patolerueshme që Shqipëria të vazhdojë të mbushet me makina që janë afër fundit të jetës së tyre. Ka ardhur koha që të ndërhyjmë për të zgjidhur këtë problem që ndikon drejtpërdrejt në cilësinë e ajrit urban e për pasojë, edhe në cilësinë e jetës së qytetarëve shqiptarë, shëndetin dhe mirëqenien e tyre. Pasqyra që na ofron realiteti ynë tregon qartë nevojën për ndërmarrjen e menjëhershme të masave dhe lehtësive për futjen në treg të makinave më afatgjata.
Ndër këto vlen të theksoj rinovimin e strukturës së mjeteve që duhet të shkojë paralelisht me nxitjen e masave për importimin e mjeteve Euro 5 dhe 6, përmirësimin e cilësisë së karburantit që tregtohet në Shqipëri, nxitjen e iniciativave ekonomike të transportit publik dhe atij ekologjik, nxitjen e investimeve private në transportin publik.
Unë do të isha shumë dakord që të flisnim drejtpërdrejt edhe për makinat elektrike, të cilat janë një tendencë e kohës dhe që kërkohen gjithmonë e më shumë dhe ka shembuj edhe në Shqipëri të përdorimit të tyre, edhe efikas, edhe të kursyer, por natyrisht me norma shumë herë më të ulëta se makinat diesel për sa i përket ndotjes së ambientit.
Gjithashtu duhet punuar për rritjen e ndërgjegjësimit publik, për të luftuar atë mentalitet shpërfillës dhe pasiv ndaj zgjidhjes së problematikave sidomos mjedisore. Një shoqëri e ndërgjegjësuar, e vëmendshme dhe proaktive ndaj mjedisit, ndikon fort në parandalimin e ndotjes dhe për pasojë zvogëlon kostot për ruajtjen e mjedisit.
Duke iu kthyer realitetit tonë, më lejoni të përmend edhe anën tjetër të problemit të makinave në fund të jetës. Është pikërisht grumbullimi i tyre në të ashtuquajturat varreza makinash dhe pika skrapi, të cilat i shohim rëndom në krah të rrugëve kombëtare. Është e pafalshme që në akset kryesore kombëtare, të gëlojnë pikat e grumbullimit të skrapit dhe varrezat e makinave, të cilat për shkak të një vakumi ligjor nuk kanë asnjë kriter sesi duhet të funksionojnë konform rregullave.
Vetëm në Tiranë, duke punuar së bashku me Inspektoratin e Mjedisit dhe Bashkinë e Tiranës kemi inspektuar, paralajmëruar, gjobitur dhe mbyllur disa javë me parë mbi 180 pika të grumbullimit të skrapit, as më shumë e as më pak, por në mes të lagjeve më të banuara të Tiranës. Këto janë të gjitha biznese që dëmtojnë drejtpërdrejt jo vetëm imazhin e kryeqytetit, por mbi të gjitha ndotja e prodhuar e vajrave apo metaleve që përpunohen aty, është sëmundje për qytetarët, është direkt ndikim në shëndetin e njerëzve.
Për t’i dhënë fund kësaj situate, brenda 1 janarit të vitit të ardhshëm, Ministria e Turizmit dhe Mjedisit do të përcaktojë udhëzimin sesi duhet një pikë grumbullimi skrapi. Kjo po bëhet në grupe pune bashkë me drejtuesit e pushtetit vendor, për të vepruar konkretisht sesi duhet të luftojmë këtë fenomen që shkakton ndotje, por edhe prish imazhin e Shqipërisë, po aq sa edhe pikat e tjera me mbetje dhe papastërti.
Varrezat
Është e pafalshme që në akset kryesore kombëtare, të gëlojnë pikat e grumbullimit të skrapit dhe varrezat e makinave, të cilat për shkak të një vakumi ligjor nuk kanë asnjë kriter sesi duhet të funksionojnë konform rregullave
Cilat janë propozimet konkrete që ju keni si Ministri?
Kjo është parashikuar në Operacionin e nisur nga MTM “Pastrojmë Shqipërinë që duam”, prezantuar pak ditë më parë dhe që përmban fushat e zgjidhjes për çdo shkaktar të ndotjes mjedisore.
Për çështjen që interesoheni, për të përmirësuar situatën, Ministria e Turizmit dhe Mjedisit parashtron disa propozime mbi të cilat mund të bashkëpunohet me Ministrinë e Infrastrukturës dhe Energjisë, mes të cilave më lejoni të përmend: rishqyrtimin dhe konsultimin e draft-propozimit “Mbi masat kundër ndotjes së ajrit nga shkarkimet e mjeteve motorike”, për të mundësuar miratimin e tij; propozimin e masave rregullatore mbi tarifat efikase dhe stimuj për rinovimin e flotës së automjeteve”; aplikimin e taksës për të gjitha automjetet në mënyrë të pavarur nga mosha, por në mënyrë proporcionale në nivelin e teknologjisë dhe nivelin e shkarkimeve të vetë automjetit; rritjen e taksave në proporcion me cilindrat/ madhësinë e motorit; gradualisht përjashtimin nga taksat të automjeteve të reja me ndotje të ulët (si Euro IV dhe V ose automjetet hibride / elektrike).
Po kështu mund të shihet edhe fuqizimi dhe pajisja e disa institucioneve të varësisë me instrumente matës dhe pajisje që kryejnë matje reale në rrugë për shkarkimet.
Lidhur me parkun e mjeteve, Ministria e Turizmit dhe Mjedisit propozon që ulja e shkarkimit të mjeteve motorike të bëhet në bazë të dy propozimeve në vendimin e rënë dakord midis disa palëve, por që duke qenë se nuk kaloi në kohën e duhur, duhet të rishikohen datat.
Ky vendim përcaktonte që “mbas datës 1 janar 2017, lejohet të importohen në Republikën e Shqipërisë vetëm mjetet motorike të kategorisë M1, M2 dhe N1, N2 të reja dhe të përdorura, që plotësojnë standardet Euro 5 të shkarkimeve në ajër; mjetet motorike ekzistuese në qarkullim, kategoria M dhe N, shkarkimet e të cilave iu përkasin standardeve Euro 1 (viti i prodhimit 1993-1994) dhe Euro 2 (viti i prodhimit 1997), marrin masat për arritjen e standardit Euro 3, brenda datës 1 korrik 2017”.
Cilat mund të jenë afatet e reja?
Ministria e Turizmit dhe Mjedisit do të ndërmarrë së shpejti iniciativën dhe do të koordinojë me Ministrinë e Infrastrukturës dhe të Energjisë si dhe me Ministrinë e Financës dhe të Ekonomisë që, brenda gjashtëmujorit të parë të vitit 2018, të hyjnë në fuqi rregullat e reja dhe standardet e propozuara nga kjo iniciativë ligjore, me qëllim fillimin e një epoke të re. Mjedisi është shëndet, është mirëqenie, është zhvillim, është nxitje për rritjen ekonomike, është kusht parësor për zhvillimin e turizmit.
Për të gjitha këto arsye madhore, operacioni “Pastrojmë Shqipërinë që duam, 24 nëntor – 24 maj”, do të mundësojë Shqipërinë e pastër në prag të sezonit turistik. Shqipëria e pastër nuk do të vijë vetëm nga aksioni në terren, por nga zgjidhja e problematikës në burim, zgjidhja e problematikës së ndotjes, dhënies fund njëherë e përgjithmonë kulturës së pandëshkueshmërisë dhe papërgjegjshmërisë së trajtimit të mjedisit.
Afatet
Ministria e Turizmit dhe Mjedisit do të ndërmarrë së shpejti iniciativën dhe do të koordinojë me Ministrinë e Infrastrukturës dhe të Energjisë si dhe me Ministrinë e Financës dhe të Ekonomisë që, brenda gjashtëmujorit të parë të vitit 2018, të hyjnë në fuqi rregullat e reja dhe standardet e propozuara nga kjo iniciativë ligjore, me qëllim fillimin e një epoke të re / Monitor.al
