Categories
Analiza Personazhe

Vdekja e Nexhmije Hoxhës/ Ikja pa ndëshkim e “Vejushës së Zezë”

Vdiq në shtratin e saj, në pleqëri të thellë, pa pasur kurrfarë brejtje në ndërgjegjen e saj. Nuk u pendua kurrë për pushkatimet pa gjyq, dhe nuk iu kërkoi kurrë të falur atyre që ende kërkojnë eshtrat e të afërmve. Të përndjekurit: Nuk na vjen keq për vdekjen e një xhelateje, na vjen keq që s’u dënua

E veja e diktatorit Nexhmije Hoxha, vdiq dje në moshën 99-vjeçare, plot 35 vjet pasi bashkëshorti i saj jo vetëm në jetë por edhe në krime ndërroi jetë. Vdiq në shtratin e saj, në pleqëri të thellë, pa pasur kurrfarë brejtje në ndërgjegjen e saj. Nuk u pendua kurrë për pushkatimet pa gjyq, dhe nuk iu kërkoi kurrë të falur atyre që ende kërkojnë eshtrat e të afërmve. Në vitet ‘90 drejtësia gjysmake e asaj kohe do e dënonte me disa vite burg, që nuk ishin asgjë me atë çka kishin provuar për 50 vjet dhjetëra mijëra të burgosur dhe internuar nga dora e sistemit që ngriti e bekoi i shoqi saj. Si për ironi të fatit, pikërisht si dje 69 vjet më parë diktatura komuniste do pushkatonte në periferi të Tiranës, 22 intelektualë, mes tyre dhe një grua Sabiha Kasimatin. Një femër patriote, e shkolluar në Itali për biologji. Nexhmije Hoxha në fillimet e saj do ishte një vajzë liceu e ardhur nga Dibra që vazhdoi liceun e vajzave “Nëna Mbretëreshë” dhe Sabiha Kasimati ka qenë mësuesja e saj. E veja e diktatorit nuk foli asnjë fjalë aso kohe megjithëse i njihte mirë bindjen antifashiste të Kasimatit. Vetë Nexhmije Hoxha sipas dokumentave të dala së fundmi ka qenë në vitet 1940-1941 anëtare e partisë fashiste, dhe po atë vit, pra në 1941 menjëherë pas krijimit të Partisë Komuniste u bë ndër të parat anëtare të saj. Ajo gjatë kohës që ishte gjallë nuk e ka përmendur asnjëherë këtë fakt, megjithëse për një gjë të tillë janë vrarë e burgosur jo pak të shqiptarë të tjerë. Pas mbarimit të luftës ajo ka mbajtur postet drejtuese të hierarkisë së kohës, ndër to dhe kryetare e Frontit Demokratik që ishte përgjegjës për internim dëbimet e qytetarëve.

Të përndjekurit

Kreu i ish-të përndjekurve politikë, Besim Ndregjoni ka reaguar në lidhje me vdekjen e Nexhmije Hoxhës, gruaja e ish-diktatorit Enver Hoxha, e cila ndërroi sot jetë në moshën 99-vjeçare. Në një dalje televizive Ndregjoni pohoi se sot (dje) u largua nga jeta një xhelate e shoqërisë shqiptare, e cila sipas tij ka bërë krime që nuk u dënuan nga qeveritë shqiptare paskomuniste. “Një ndjesi boshllëku do ta quaja. Që u largua një xhelate nga shoqëria shqiptare e cila për krimet që bëri, nuk u dënua, por u dënua për kafe. Një maskaradë e qeverive shqiptare paskomuniste që mos të dënonte krimet e saj dhe të bashkëshortit të saj Enver Hoxha. Kur vdes një xhelat nuk ka ndjesi, por ndihesh shumë i trishtuar kur mbas 30 vitesh pluralizmit politik, 4500 familje kërkojnë eshtrat e njerëzve të tyre dhe kjo klasë politike e papërgjegjshme në vend që t’i gjente këto eshtra, i ka lënë këto familjarë në zi. Çdo gjë do ta pranoja, por sigurisht që Nexhmie Hoxha dhe në vitin e fundit të vdekjes së saj me librin e saj fliste me një urrejtje ndaj të përndjekurve politikë. Ndaj çfarë ndjesie mund të kesh për një xhelate.”, -tha ai.

Historia

Historia komuniste e Shqipërisë është më e trishta në Evropën lindore, pasi ishte dhe diktatura më e egër. Ai sistem, ku kurorën e mbretëreshës e mbante gruaja që vdiq dje, prodhoi jo pak viktima. Kanë vdekur fëmijë në kampe internimesh, janë pushkatuar gra shtatzëna, nënat janë detyruar të varrosin foshnjat. E gjitha kjo se diku një i afërm i tyre kish shprehur një fjalë kundër sistemit, apo kish dashur të shpëtonte nga vargonjtë e diktatit duke u arratisur. Janë vrarë baballarët e janë burgosur djemtë, apo më keq akoma. Janë vrarë djemtë e janë internuar pleqtë të cilët detyroheshin të punonin në kënetën e Maliqit, të Lushnjës e Tepelenës. Historitë nuk kanë fund dhe vargu i atyre që rrëfejnë. Shumë prej ish të përndjekurve kanë marrë kompensim financiar ndër vite, i pamjaftueshëm por kanë marrë. Dhe gjithsesi nuk mjafton. Kompensimi nuk duhet vetëm material por edhe moral, dhe ky i fundit ka munguar. Historia e Rumanisë na e tregon më së miri këtë. Nikola Çaushesku dhe gruaja e tij Helena u ndëshkuan për atë që bënë. Në Shqipëri nuk ndodhi. Qoftë diktatori, qoftë ajo që la pas vdiqën të dy në shtratin e tyre.

Dervishi: E nisi si zogiste, e vazhdoi si fashiste, e mbylli si 99-çe

Historiani Kastriot Dervishi me anë të një postimi në Facebook, ka bërë dhe një përmbledhje të asaj se kush ka qenë Nexhmije Hoxha. “Nexhmije Hoxha, bashkëshortja e diktatorit më të egër që ka parë toka shqiptare, atij që i solli dëme të pallogaritshme vendit, dëme që as pushtuesit nuk ia shkaktuan, vdiq sot me të vërtetë. Njeriu që ishte përgjegjës po aq sa bashkëshorti i saj, nuk do të vazhdojë më të bëjë propagandën e idealit kriminal. Nga ajo dhe bashkëshorti i saj, mijëra familje mbetën pa të afërt, ndërsa vendi u zhyt në varfëri e krim. Ajo e nisi jetën duke nderuar si zogiste. Si karrieriste që ishte u vesh edhe fashiste. E vazhdoi e përfundoi si komuniste. Ishte shefja e propagandës komuniste dhe mbështetësja dhe frymëzuesja më e ngushtë e Enver Hoxhës në krimet e tij. Jeta e saj mbeti duke e lënë një 99-çe”, thotë Dervishi.

Skeda politike e Nexhmije Hoxhës (1921-2020)

-Anëtare e Partisë Fashiste, 1940-1941

-Anëtare e Partisë Komuniste, 1941-1948

-Anëtare e Partisë së Punës, 1948-1991

-Drejtore e Drejtorisë së Agjitacionit e Propagandës në Komitetin Qendror, 1950-1958

-Drejtore e Drejtorisë së Arsim-Kulturës në Komitetin Qendror, 1958-1966

-Drejtore Institutit të Studimeve Marksiste-Leniniste në Komitetin Qendror, 1966-1991

-Deputete e Kuvendit Popullor, 1948-1991

-Anëtare e Komitetit Qendror të PPSH-së, 1948-1991

-Anëtare e Presidiumit të Kuvendit Popullor, 1950-1954

-Kryetare e Frontit Demokratik, 1986-1990

-E burgosur për abuzime financiare, 1991-1997

Çika: Nuk më vjen keq për një xhelate, u pastrua shoqëria nga mbetjet

Kreu i Shoqatës Antikomuniste dhe ish-të Përndjekurve Nebil Çika deklaroi dje se Nexhmije Hoxha ishte iniciatore e shumë krimeve në kohën e diktaturës dhe ishte e papenduar deri në fund te jetës për atë çfarë kish ndodhur në këtë vend. “Nuk përmendet pjesa që ka qenë bashkëpunëtore në krimet e diktatorit. Ka qenë një anëtare e partisë fashiste. Ajo ishte iniciatore e shumë krimeve dhe e papenduar deri në fund të jetës për krimet që kishte kryer bashkëshorti i saj dhe diktatura. Ishte një nga autoret më të rrezikshme të krimeve kundër njerëzimit në Shqipëri. Është një pastrim nga shoqëria, nga këto lloj mbetjesh që kanë marrë jetën e miliona shqiptarëve. Komunizmi ka rrënjë të thella në Shqipëri. Ajo kishte akoma përkrahës, apo autorë të krimit të komunizmit dhe janë ende në pushtet. Autorë të krimit të njerëzimit, janë sot në postet më të larta drejtuese të shtetit shqiptar. Gjithsesi nuk mund të them se jam i keqardhur për vdekjen e saj. Unë mendoj se ka shumë rrënjë të thella komunizmi në vend, jo vetëm në burimet njerëzore. Shqipëria nuk e ka bërë dot shkëputjen me diktaturën komuniste, pasi nuk ka ndëshkuar personat përgjegjës për krimet.” – u shpreh Çika.

/ burimi: MAPO

Categories
Personazhe

Ditëlindja/ 109 vite më parë lindi Nene Tereza

Sot është një ditë e shënuar dhe që vlen të kujtohet nga të gjithë shqiptarët në mbarë botën.

Si sot 109 vite më parë erdhi në jetë një ndër njerëzit më të shquar të Shqipërisë, që do të kujtohet padyshim brez pas brezi. Bëhet fjalë për Gonxhe Bojaxhiun, e njohur në gjithë botën si Nënë Tereza. Gruaja me mendje dhe zemër të madhe lindi më 26 gusht 1910 në Shkup.

Nobelistja e paqes ia kushtoi tërë jetën e saj çështjes së bamirësisë, duke i ndihmuar familjet e varfra dhe personat e sëmurë. Nëna Terezë ndërroi jetë më 5 shtator 1997.

Categories
Personazhe

Isabella Rossellini: Ja pse braktisa qytetin, për të jetuar në fshat

Aktorja e famshme italiane, Isabella Rosellini rrëfen çastet më të rëndësishme të jetës së saj.

Ajo ndalet në momentin kur vendosi të braktisë qytetin vetëm për pasionin e saj. “Isha e lodhur nga smogu i qytetit dhe nga qëndrimi zgjuar gjithë natën për të pritur djalin tim. Qëndrimi mes gjelbërimit të frymëzon”, shprehet ajo.

Me elegancën e saj natyrale, buzëqeshjen e ndritçme, nëna e Ingrid Bergman, Isabella Rossellini në moshën 70-vjeçare ruan të njëjtën bukuri ashtu sikurse edhe në vitet e para të karrierës së saj.

“Jam antike”, shprehet me ironi, armikja e botox, flokëve të gjata, duke shtuar se i pëlqen të plaket me fytyrën e saj.

Vajzë e dy prindërve artistë, karrierën e saj artistike e ka nisur si modele, aktore, producente, regjisore, stiliste dhe tashmë është bërë një zonjë romantike fshati, pasi është larguar nga New York dhe është transferuar në Bellport.

“Këtë pasion e kam zbuluar fal mikut tim fotograf, Bruce Weber, pasi së bashku me bashkëshorten me ftonin shpesh nën shtëpinë e tyre. Udhëtoja me tren, Bellport është pranë New York por është një tjetër botë ka det dhe gjelbërim. Kam thënë: Përse nuk shkoj dhe unë të banojë në këtë vend fantastik? Nuk dëshiroja më të qëndroja në Manhattan, në trafik dhe smogun e qytetit, duke pritur zgjuar përgjatë gjithë natës djalin tim Roberto. Edhe atij i pëlqeu kjo ide dhe fillimisht shitëm apartamentin dhe tani jetojmë në natyrë. Është shumë bukur”, vijon ajo.

Rossellini është adhuruese e kafshëve dhe pëlqen të ketë në shtëpinë e saj pula, prej të cilave merr vezët e freskëta.

 

Categories
Personazhe

Si u dënua bosi i drogës ‘El Chapo’ dhe gjoba prej 12 miliardë dollarësh për meksikanin

Rreth një gjysmë viti pas burgosjes së bosit të drogës Joaquín “El Chapo” Guzmán, gjyqtari shpalli masën e denimit. Meksikani duhet të qendrojë në burg të përjetshëm – në rast se nuk arratiset sërish.

Nga Deutsche Welle

Denimi zyrtar përfshin burgim të përjetshëm plus 30 vjet. I dënuari nuk mund të bëjë kërkesë për lirim të parakohshëm, tha gjyqtari Brian Cogan. Përveç kësaj gjyqi i kërkoi Guzmánit të paguajë një shumë prej rreth 12.6 miliardë dollarësh (rreth 11.2 miliardë euro). Kjo është një “përllogaritje konservatore” e shumës, që ai ka marrë nga biznesi kriminal me drogën, pati komunikuar më parë prokuroria.

Ligji federal që lejon dënimin me vdekje u përjashtua paraprakisht, pas një marrëveshjeje mes SHBA-së dhe Meksikës, prej nga u ekstradua Guzmán pas arrestimit të tij.

Refuzohet një gjykim i ri

Para shpalljes së dënimit Guzmánit iu dha mundësia të thotë fjalën e tij. Ai tha, se atij i është mohuar një proces korrekt. Mbrojtësit e Guzmánit deri në fund u përpoqën pa sukses, që ta rinisnin procesin. Sfondi ka të bëjë me një informacion mediatik, sipast të cilit anëtarët e jurisë së të betuarve gjatë procesit kishin ndjekur raportimin për të. Si rrjedhojë ata kanë pasur dijeni për hamendësimet paragjykuese, të cilat nuk mund të përdoren në proces. Megjithatë një gjyqtar e refuzoi kërkesën e mbrojtjes për një proces të ri. Sipas tij, sasia e provave kundër bosit të drogës ishte gjithsesi shokuese.

Guzmáni, që për shkak të gjatësisë së trupit 1.64 metra i ishte vënë nofka “El Chapo” (i shkurtëri), në shkurt në procesin më të madh të kryer ndonjëherë në historinë e kriminalitetit të drogës në SHBA u gjet fajtor në të dhjetë pikat e akuzës – ndër të tjera edhe për pjesëmarrje në një organizatë kriminale, në prodhimin dhe shpërndarjen ndërkombëtare të drogave kokainë, heronië, metamfetaminë dhe marihuana si dhe për larje parashë e përdorim armësh zjarri.

Meksikani konsideorhet si baroni më i fuqishëm i drogës pas kolumbianit Pablo Escobar. Ai ka qenë për vite me radhë shef i kartelit famëkeq Sinaloa. Kontrabandë drogë në masë, tregti me armë dhe larje parashë kanë qenë bizneset kryesore të 62 vje?arit, i cili sipas dëshmitarëve ndër të tjera rekrutonte vrasës me porosi e në vrasje e tortura ka qenë edhe vet aktiv.

“El Chapo” vlerësohet prej shumë meksikanëve – një e supozuar si vajza e tij shet me emrin e tij një linjë mode.

54 dëshmitarë dëshmuan në procesin voluminoz, ndër ta ish-partnerë e bashkëpunëtorë si dhe një ish e dashura e tij. Shumica ndodhen po ashtu në burgjet e SHBA-së. Sipas dëshmive Guzmán ka urdhëruar rrëmbime e vrasje të konkurrentëve ose policëve, që nuk pranon ryshfet. Baroni i drogës ka rreth njëqind bodyguardë, që janë të pajisur me pistoleta, armë automatike, granata e madje edhe hedhës predhash.

Sipas një dëshmitari krahas shumë të tjerëve ai i ka paguar ryshfet milionësh edhe ish-prresidentit meksikan Enrique Peña Nieto. Ish-drejtuesi i kabinetit të Peña Nieto i hodhi poshtë këto akuza.

Guzmán ndodhet ndërkohë në një burg të sigurisë së lartë në Nju Jork në zonën Manhattan. Më parë ai ia ka dalë të arratiset dy herë nga burgjet meksikane: Më 2001 ai u arratis duke u futur në një kazan rrobash dhe më 2015 përmes një tuneli, që kishin hapur bashkëpunëtorët e tij deri në qelinë e tij.

Një shans të tillë ai me gjasë nuk do ta ketë në SHBA. Me shumë gjasë Guzmán do të dërgohet në një burg të sigurisë ekstreme në zonën e Rocky Mountains. Burgu “ADX Florence” në shtetin federal të Colorados për shkak të kushteve të rrepta të burgimit prej disave konsiderohet si ferri në tokë. Burgu i ndërtua më 1994, sipas Amnesty International (AI) është i specializuar për izolimin ekstrem të të burgosurve.

Kontakt me të burgosurit e tjerë, sipas AI, ata kanë vetëm dy orë në ditë gjatë kohës së “çlodhjes”, kur të burgosurit mund të bëjnë stërvitje të trupit. Ata që konsiderohen si tepër të rrezikshëm edhe gjatë këtyre ushtrimeve fizike janë të izoluar në kafazë individualë, jo më të mëdhenj se 7.50 metra katrorë.

Për kushtet e deritanishme të dënimit në një burg të Nju Jorkut Joaquín “El Chapo” Guzmán është ankuar në mënyrë të përsëritur. Ai ia doli vetëm që t’i japin një batanie më të trashë, por nuk ia plotësuan kërkesën për tamponët e veshëve për qetësi. Në pozicionimin e tij para shpalljes së vendimit bosi i drogës e cilësoi izolimin e tij në SHBA si një “torturë psikologjike, emocionale dhe mendore”.

Categories
Bota Personazhe

Arrestohet bashkëthemeluesi i Wikileaks, Julian Assange

Bashkëthemeluesi i Wikileaks, Julian Assange, është arrestuar në ambasadën e Ekuadorit në Londër, raporton BBC.

Shtatë vite më parë, Assange ishte strehuar në ambasadë si refugjat me të vetmin qëllim që të shmang ekstradimin e tij tek autoritetet suedeze, pasi mbi të rëndonin akuzat për sulm seksual, transmeton Telegrafi.

Policia metropolitane ka njoftuar se është arrestuar dhe shumë shpejt pritet të paraqitet në sallën e gjyqit të Westminster.

Assange u arrestua nga policia, pasi i është refuzuar kërkesa për vazhdimin e statusit të refugjatë në ambasadën e Ekuadorit në Londër.

“Julian Assange, 47-vjeç, sot, më 11 prill, është arrestuar nga policia metropolitane në ambasadën e Ekuadorit”, thuhet në komunikatën e lëshuar nga Scotland Yard. /Telegrafi/