Categories
Sport

U shpall lojtari më i mirë i ndeshjes, si shpërblim merr një pulë

Nuk kanë fund çudirat në futbollin afrikan. Sulmuesi i skuadrës Nyasa Big Bullets nga Malavia, Hasan Kajoke, u zgjodh futbollisti më i mirë i ndeshjes, dhe si shpërblim iu dhurua një pulë.

Kajoke, i cili shënoi dy gola në fitoren 5-0, teksa në fundin e sfidës, një tifoz i dorëzoi pulën në një kuti kartoni ku shkruhej “Kajoke BB”.

Ky moment është fotografuar, teksa po bën xhiron e internetit. Ky vlerësim duket se është pritur mjaft mirë nga futbollisti, i cili tashmë është bërë i famshëm, pas këtij momenti.

“Ju vetëm duhet ta doni një tifoz të Bullets”, shkroi klubi në “Facebook”.

Nuk është hera e parë që të tilla situata ndodhin në futbollin afrikan.

Kujtojmë që më herët, në Afrikën e Jugut, Mamelodi Sundouns, mori si shpërblim 5 giga byte internet, për performancën e tij në fushë.

Ndërkohë në Zimbabve, futbollistëve u janë dhuruar arka me birrë.

Çudirat nuk përfundojnë këtu, pasi në Ganë janë dhuruar sandale për futbollistin më të mirë të ndeshjes, ndërsa në Botsvana, pako me ushqime.

Categories
Sport

Serie A/ Njihuni me notën e sezonit për Thomas Strakosha

Pakkush ka dyshime që Thomas Strakosha ka qenë një ndër emrat më të spikatur të këtij edicioni në Serinë A.

Portieri i përfaqësueses shqiptare ka qenë një nga elementët kyç të Lazios që fitoi Kupën e Italisë dhe arriti që për një pjesë të madhe të sezonit të ishte edhe pretendente për të shkuar në Ligën e Kampioneve.

Sigurisht që me paraqitje të tilla kanë ardhur edhe vlerësimet. Kështu, sipas notave që ka marrë portieri shqiptar gjatë gjithë këtij sezoni në Serinë A, ai rezulton të jetë futbollisti i 33-të më i mirë në listë sa i përket notës mesatare sipas vlerësimeve të përjavshme të dhëna nga portali “Tuttomeracotweb”.

Ai ka një vlerësim të njëjtë me Radu të Genoas dhe talentin Zaniolo të Romës, pasi të tre kanë mesataren 6,21 të notës për këtë edicion.

Një konfirmim për portierin shqiptar i cili përmirëson me 1/10-at mesataren e sezonit të kaluar. Ai pret edhe një penallti ndaj De Paul dhe sidomos në pjesën e parë të sezonit u bë protagonist me paraqitje të jashtëzakonshme. Një tjetër goditje e drejtorit sportiv Igli Tare, Strakosha është e tashmja dhe e ardhmja e Lazios”, shkruhet në përshkrimin për portierin kuqezi.

Categories
Sport

Kombëtarja bëhet me trajner të ri / Edy Reja vjen pas Panuccit

Federata Shqiptare e Futbollit duket se ka bërë zgjedhjen e saj, pas një periudhe gati njëmujore kërkimesh, sa i përket kreut të pankinës së përfaqësueses shqiptare në futboll.

Ai do të jetë Edy Reja, ndërkohë që prezantimi pritet të bëhet në ditët në vijim.

Tekniku italian, me një eksperiencë të gjatë drejtimi ekipesh në Serie A, do të pasojë kështu bashkëkombasin e tij, Christian Panucci, i cili u shkarkua pas humbjes me Turqinë në Shkodër.

Categories
Sport

Panucci te Roma? Ja përgjigja që jep Duka për lajmin e bujshëm nga Italia

“Drejtues të Romës kanë nisur kontaktet me Christian Panuccin”, ky ishte lajmi i bujshëm nga mediat italiane që po përflasin një largim të teknikut italian nga Kombëtarja shqiptare.

I ftuar në emisionin “Kampionët” në “Vizion Plus”, presidenti i FSHF-së, Armand Duka ka folur për të vërtetën që qëndron pas këtij lajmi.

Raportohet se ka pasur telefonatë nga Roma për Panuccin…

Nuk e kam lexuar. Mund të jetë ndonjë “lajm i rremë”, mund të jetë e vërtetë ndonjë telefonatë. Por, besoj se nuk ndodh që një trajner profesionist si Panucci që të bëjë biseda të tjera në një kohë që është trajner i Shqipërisë. Nuk mund të komentoj. Mund t’ju them me bindjen timen që Panucci dhe të gjithë ata që janë profesionistë, të bëjnë negociata për kontrata ndërkohë që janë nën kontratë”, tha Duka.

Categories
Sport

Panucci e pranon: Na zuri gjumi te goli, tani jemi jashtë!

E tradhtuar nga vetja në vetëm dy episode specifike, Shqipëria e pësoi rëndë, duke dalë e mundur me rezultatin 2-0 në transfertë ndaj Izraelit në ndeshjen e tretë të vlefshme për Grupin 1 të Ligës C, në kompeticionin e Ligës së Kombeve

Një disfatë e hidhur, që gati zyrtarizon dështimin e Shqipërisë në këtë garë, por ndërkohë, trajneri i kuqezinjve, Christian Panucci, nuk pranon me zë të lartë dorëzimin. Kreu i pankinës së Shqipërisë, preferoi të ndalet tek loja e shkëlqyer e kuqezinjve, teksa ka komentuar edhe dy golat e pësuar.

“Jam shumë i keqardhur për djemtë sepse kanë bërë një ndeshje të shkëlqyer, kemi shkatërruar kundërshtarin kemi pësuar një gol nga rivënia e portierit, ndërsa të dytin si autogol. Të kthehesh në shtëpi pas një ndeshje kështu me humbje 2-0 të dhemb vërtetë shumë. Na zuri gjumi te momenti i golit. Është e vështirë të fitosh 3-0 ndaj Skocisë dhe pastaj të shpresosh edhe për rezultatin e duhur në përballjen tjetër mes kundërshtarëve tanë. Pastaj ne jemi jashtë. Nuk jam i dorëzuar, por me këtë rezultat këtu bëhet shumë e vështirë. Më vjen keq shumë pas një ndeshje kështu. Nuk më pëlqen kur përmendin emra futbollistësh të përveçëm. Sot bëmë një ndeshje të shkëlqyer në tërësi”, deklaroi trajneri i Shqipërisë, Christian Panucci, në konferencën për mediat të dhënë pas humbjes në transfertë ndaj Izraelit me rezultatin 2-0.