Plani i SHBA: Ushtria e Kosovës pas 3-5 vjetësh në veri

 

Në tavolinën e negociatave të raundit të nëntë ndërmjet Prishtinës e Beogradit do të jetë plani të cilin e ka përgatitur SHBA, pikë kyçe e të cilit është se nuk do të ketë ushtri të Kosovës në veri, transmeton FoNet.  Sipas burimeve të kësaj gazete, Prishtina në raundin e sotëm do të pranojë shumë koncesione që çojnë drejt marrëveshjes, por koncesione priten edhe nga Beogradi, por pa e rrezikuar kërkesën themelore – sigurinë e Bashkësisë serbe në veri e jug të Ibrit.  Sipas planit amerikan, Forcat e Sigurisë të Kosovës brenda disa viteve të ardhshme nuk do të jenë në pjesën veriore të Kosovës. Propozimi i ndërmjetësit të “panjohur” është që kjo periudhë të jetë tre deri në pesë vjet, ndërsa Serbia kërkon një periudhë dhjetëvjeçare, kështu që duket se periudha pesëvjeçare do të jetë opsioni më real.  Po ashtu sipas burimeve të kësaj gazete konfirmohet se FSK-ja, ushtria e ardhshme e Kosovës, në veri do të mund të ndërhyjë vetëm në raste të fatkeqësive elementare, pra pa armë.  Pikë tjetër e planit e marrëveshjes së mundshme është autonomia e plotë e Bashkësisë së komunave serbe në arsim, shëndetësi dhe mbrojtje sociale, ashtu siç parashihet edhe me Planin e Ahtisarit.  Njëherësh, Prishtina merr obligimin se nuk do të kërkojë zgjerimin e Bashkësisë as me pjesën jugore të Mitrovicës, as me komuna të tjera me popullsi shumicë shqiptare.