Nëse ja vlen, ndaje me miqtë...
Share on Facebook
Facebook
0Pin on Pinterest
Pinterest
0Tweet about this on Twitter
Twitter
Share on LinkedIn
Linkedin

Kryetarja e Kuvendit, Jozefina Topalli dënoi dhunën e organizuar të një grupi deputetësh të opozitës, me qëllim bllokimin e procedurave të votimit në seancën e sotme parlamentare. Në një deklaratë për mediat, kryetarja Topalli thekson se në seancën e sotme parlamentare, sipas pikës së rendit të ditës për votimin e anëtarit të KLD, nisi procedura në përputhje me Rregulloren e Kuvendit e votimit te fshehtë dhe me kuti, për dy kandidaturat alternative të paraqitura sipas vullnetit konsensual të dy palëve. “Procedura e votimit të fshehtë me kuti, parashikon se sekretariati i votimit, administron procesin me fuqi të plota. Ai administron fletët e votimit të cilat vulosen dhe firmosen nga të gjithë anëtarët përpara se t’i dorëzohen secilit deputet që kryen procedurat e votimit. Votimi kryhet individualisht në dhomën e fshehtë të ngritur për këtë qëllim. Kështu ka ndodhur votimi në 20 vjet parlamentarizëm kur çdo deputet voton brenda parlamentit, kështu ka ndodhur votimi në 20 vjet demokraci, kur çdo shqiptar voton në zgjedhje. Për herë të parë sot, grupi i opozitës dhunshëm kërkoi të ndryshoheshin këto procedura, kërkoi që t’i rrëmbente kompetencën sekretariatit të votimit dhe procesi i votimit të administrohej sipas urdhrave që Gramoz Ruci i merrte me telefon. Në këtë akt dhune, Gramoz Ruci, pasi konsumoi kërcënimet për bllokim të votimit, rrëmbeu fletët e votimit për të mos lejuar votimin me fletë. Në këtë situatë, Parlamenti, në përputhje me Rregulloren procedoi me votimin e fshehtë me elektronikë. Ky veprim i dhunshëm i drejtuar nga Kryetari i grupit parlamentar të Partisë Socialiste z.Gramoz Ruçi është forma më e shëmtuar e praktikave recidiviste me të cilat Partia Socialiste, kërkoi prej më shumë se dy vjetësh të mbante Shqipërinë larg prej procesit të integrimit. Ky veprim u krye në kundërshtim flagrant me procedurat që përcakton rregullorja për votimin, me praktikën 20 vjeçare parlamentare për këtë çështje dhe në shkelje të vendimit përkatës të Komisionit të votimit”, vijon deklarata për mediat. Më tej kryetarja e Kuvendit thekson se kjo dhunë e organizuar dhe e qëllimshme është dhunë ndaj parlamentit, parlamentarizmit dhe shtetit ligjor. Për këtë arsye Kryetarja e Kuvendit shpreh mospajtimin e saj të hapur dhe publik me këtë shfaqje të shëmtuar dhe i bën thirrje Grupit Parlamentar të PS të analizojë me përgjegjësi veprimin dhe t’i kthehet parlamentit dhe shtetit ligjor.

Nëse ja vlen, ndaje me miqtë...
Share on Facebook
Facebook
0Pin on Pinterest
Pinterest
0Tweet about this on Twitter
Twitter
Share on LinkedIn
Linkedin